Eins og AirBnb og Uber en fyrir tón­listar­kennslu

Moombix var stofnað af Margréti Júlíönu Sigurðardóttur frumkvöðli og tónlistarkonu. Margrét er tónlistarmenntuð og stundaði nám við the Royal Academy of Music í London. Moombix er markaðstorg og kennslurými fyrir lifandi tónlistarkennslu á netinu, þar sem nemendur geta lært tónlist frá reyndum kennurum og tónlistarfólki hvar sem er í heiminum.

„Við viljum skapa vettvang sem gerir tónlistarnám aðgengilegt fyrir alla, óháð staðsetningu eða reynslu. Moombix er fyrir alla þá sem elska tónlist og vilja dýpka þekkingu sína, taka fyrstu skrefin að læra á hljóðfæri, semja sína eigin tónlist eða reyna fyrir sér sem plötusnúður. Hefðbundin tónlistarkennsla er fyrst og fremst ætluð fyrir börn á skólaaldri og hafa því fullorðnir haft takmarkaða möguleika til að læra. Við viljum koma til móts við þennan hóp, auka aðgengi að tónlistarkennslu og byggja kennsluna meira á forsendum nemendanna“, segir Margrét Júlíana Sigurðardóttir, forstjóri og stofnandi Moombix.

Í tilkynningu segir að Moombix megi líkja við AirBnB eða Uber en í heimi tónlistar. Þar megi finna fjölbreytt úrval tónlistarkennara sem kenna ólíkar tónlistagreinar. Allt frá kennslu klassískra hljóðfæra til kennslu á tónsmíða- og plötusnúðaforrit.

Þá segir að við þróun Moombix hafi fullorðnir notendur verið hafðir í huga sem ekki hafi tíma til að binda sig við hefðbundna tónlistarkennslu en hafa áhuga á að læra tónlist þegar þeim hentar.

Tónlistariðkun sé lífsstíll

„Hugmyndin er að tónlistariðkun sé eins konar lífsstíll rétt eins og að fara í jógatíma, læra á gönguskíði, spila golf eða læra tungumál á netinu.“

Eins og er bjóða um 200 kennarar upp á kennslu í Moombix. Þar á meðal tónlistarmenn sem tilnefndir hafa verið til Grammy verðlaunanna og sem hafa starfað með Massive Attack og Kylie Minogue. Tónlistarkennarar stjórna sínum eigin kennslustundum, tekjum og kennslutíma.

„Við hjá Frumtaki erum mjög spennt að styðja Moombix í sókn sinni á erlenda markaði. Fyrirtækið hefur möguleika á að geta gjörbylt tónlistarkennslu með auknum sveigjanleika og aðgengi fyrir nemendur og kennara. Með þessu móti er hægt að laða til sín kennara og tónlistarfólk sem vill stjórna sínum tíma sjálft og geta kennt hvar sem er í heiminum“, segir Andri Heiðar Kristinsson, fjárfestingastjóri og meðeigandi Frumtaks Venture.