Blaðasnápurinn Stefán Einar fórnar kampa­vínskóngs­titlinum

„Það er hárrétt hjá þér og hefur ekki verið neitt launungarmál. Við höfum ekki verið að básúna um þetta en þannig var að mér var gert tilboð í fyrirtækið í október. Og eftir stuttar, snarpar en sanngjarnar samningaviðræður tókust samningar. Og ég afhenti fyrirtækið í nóvember til nýrra eigenda.“

UPPI bar keypti Kampavínsfjelagið

Stefán Einar er líklega einn þekktasti kampavínsmaður landsins. Hann hefur (mis)notað aðstöðu sína á vettvangi fjölmiðla og í hlaðvarpinu Þjóðmál þar sem hann er reglulegur gestur, til að fjalla vítt og breytt um kampavín og kunna margir vel að meta það. „Kampavínið flæðir og Stefán Einar græðir“ var fyrirsögn Viðskiptablaðsins sem sagði af því að fyrirtæki hans Kampavínsfjelagið & co hefði hagnast um sem nam fimm milljónum árið 2021 og aukning hafi orðið um 190 prósent milli ára.

Það eru í raun þrjú félög sem kaupa Kampavínsfjelagið sem eru í eigu Styrmis Bjarka Smárasonar, Jóhönnu Húnfjörð (eiginkonu hans) og þá Hrefnu Sætran matreiðslumeistara.

„Þau eiga saman Uppibar sem er fyrir ofan Fiskmarkaðinn,“ segir Stefán Einar. En Kampavínsfjelagið hafi unnið mikið með þeim og aðstoðað við að fá inn fín og góð vín. Stefán Einar segir aðdáunarvert hvernig þau hafi tekið þetta starf áfram.

Segist sestur í helgan stein

„Þetta var beibí sem spratt upp fyrir tilviljun og kaldhæðni örlaganna. Ég stofnaði þetta í september 2020 og það er nú fjögurra ára gamalt.“

Margir vilja meina að þú hafir misnotað aðstöðu þína við að koma kampavíninu rækilega á kortið, en við ættum kannski heldur að tala um að nota?

„Þetta er fyrirtæki sem hefur ekki verið að selja á einstaklingsmarkaði,“ segir Stefán Einar og lýsir því að hann hafi átt í gjöfulu samstarfi við helstu vínspekúlanta á bestu veitingastöðum landsins. Þrír veitingastaðir státa af því að hafa fengið hina eftirsóttu Michelin-stjörnu, Moss, Óx og Dill og þau hafa öll átt í samstarfi við Kampavínsfjelag Stefáns Einars.

„Þetta sprettur upp af áhuga mínum á þessu fyrirbæri og svo byggist upp portfólíó,“ segir Stefán Einar.

Veltan á félagi hans í fyrra, sem er þá síðasta heila árið sem það var rekið í hans eigu, var hundrað milljónir þannig að um er orðið að ræða stöndugt fyrirtæki sem rekið hefur verið úr rassvasa Stefáns, eins og hann orðar það og hlær.

En ertu þá hættur í víninu?

„Ég er sestur í helgan stein. Nú fer maður að njóta lífsins eftir þessa þrekraun,“ segir Stefán Einar.

Liggur ekki í kampavínsmarineringu dagana langa

En þetta skýrist meðal annars af því að þau verkefni sem hann hefur verið að sinna fyrir Spursmál, þátt Stefáns Einars á Morgunblaðinu, hafa vaxið mikið af umfangi.

„Það hefur verið mikið verk að leiða þann umræðuvettvang. ég var ekkert á þeim buxunum að selja þetta, en þetta tilboð kom og ég stóð frammi fyrir þeirri ákvörðun hvort ég ætlaði að taka þetta áfram eða draga strik í sandinn. Og þetta varð niðurstaðan.“

Stefán Einar á marga góða vini í hópi fremstu víngerðarmanna Evrópu sem hann heimsækir reglulega. Og hann var í Campagne-héraði þegar síðasta uppskera var tekin í hús.

Menn margir hafa átt og eiga í brögðóttum viðskiptum við Bakkus og Stefán Einar segir að menn eigi að fara varlega í þessum efnum.

„Þetta er fyrirbæri sem maður þarf að umgangast af virðingu. Það er ekki þannig að ég liggi í kampavínsmarineringu alla daga, eins og sumir vilja vera láta. Því fer víðs fjarri – það er sem betur fer ekki þannig.“

Smakkklúbburinn lifir áfram 

Í tengslum við Kampavínsfjelagið hefur þróast smakkklúbbur sem Stefán Einar stofnaði og verður sá klúbbur, sem telur yfir hundrað manns, áfram starfandi.

„Hann fylgdi með í kaupunum. Ég mun halda áfram að halda utan um kynningar en þetta er virkur félagsskapur. Sem hittist reglulega á átta til tíu vikna fresti. Þá er kannski eitt kampavínshús tekið fyrir. Og við blandast hvítt og rautt líka og í samstarfi við mörg af bestu veitingastöðum landsins. Ég fæ að hafa aðkomu að þessu út frá fræðsluvinklinum.“

Stefán Einar hefur á þessum fjórum árum fengist við ýmislegt sem sætir tíðindum. Minnsta flaska sem hann hefur flutt inn er 200 millilítra. Sú stærsta 18 lítra flaska en hún var opnuð á Hvalasafninu.

Stefán Einar hefur flutt inn 50 ára gömul kampavín, flöskur sem hafa verið framleiddar í hundrað eintökum fyrir allan heiminn. Og hefur verið fara á upp í milljón, eina og hálfa jafnvel. Stefán Einar hefur verið að sækja það sem fremst er gert í þessum heimi.“

Maður á að taka það besta út úr þessu lífi

En hvert er dýrasta kampavínið sem þú hefur flutt inn?

„Ég myndi halda að það sé Charles Heidsig Collection Crayers, árgangur 1985. Það voru 165 flöskur framleiddar og við fengum eina í kvóta sem ég tók inn.“

Stefán Einar segir að gott kampavín geymist von úr viti, yfir hundrað ár ef því er að skipta. En hvað kostar sú flaska?

„Það er trúnaðarmál. Hún kostaði mjög mikið í innkaupum og er á góðum stað í dag. Mér tókst ekki að selja allar flöskurnar sem ég flutti inn. En nú er ég hættur að flytja inn og græða á innflutningi – nú er bara að njóta. Maður á að taka það besta sem býðst út úr þessu lífi.“

En nú þegar þú ert hættur að vera kampavínskóngur, en þú hefur gjarnan verið kallaður fjölmiðlamaður og kampavínskóngur, hvað á ég þá að titla þig?

„Blaðasnápur. Fer það okkur ekki best? Þeim finnst sumum gott að nota það.“