Af hverju er þessi kona á öllum aug­lýsinga­skiltum?

„Hví er mynd af frönsku stórleikkonunni Isabelle Huppert á öllum strætóskýlum í bænum?“ spurði Egill Helgason Facebook-vini sína á nýársdag. 

Egill var örugglega ekki sá eini sem var að velta því fyrir sér. Menningarsinnaðir vinir Egils voru þó fljótir að svara honum og skýra málið. Um er að ræða myndlistarsýninguna Auglýsingahlé, stærstu myndlistarsýningu ársins í almannarými, sem er haldin árlega fyrstu þrjá daga ársins á mörg hundruð skiltum um allt land. 

Í ár sýnir bandaríski listamaðurinn Roni Horn, sem er með annan fótinn hér á landi, verk sín á sýningunni sem er á vegum fyrirtækisins Billboard, sem á 650 stafræn auglýsingaskilti vítt og breitt um höfuðborgarsvæðið, Listasafns Reykjavíkur og Y gallerýs.

Auglýsing án tískumerkis

Verkið samanstendur af ljósmyndum af frönsku leikkonunni Isabelle Huppert og dagbókarskrifum og teikningum Horn. 

„Þetta nýja verk á skjáunum vísar í ýmis önnur verk, skrifin eru úr verkinu „Log“ sem byrjaði 2020 og ljósmyndirnar af Huppert hefur hún sýnt áður sem „Portrait of an Image“. Þá fékk hún Huppert til að leika öll hlutverkin sem hún hefur leikið en án samhengis,“ segir Siguður Atli Sigurðsson, myndlistarmaður og eigandi Y gallerýs.

„Listamaðurinn segir kannski voða fátt um verkið, það er opið fyrir túlkun. En maður sér heimsþekkta konu sem er oft mótíf fyrir auglýsingar en svo er engin auglýsing. Það vantar tískumerkin, hún er ómáluð og sést ekki í nein föt, það er bara manneskjan eftir,“ segir hann.

Vegna staðsetningar auglýsingaskiltanna sér þorri þjóðarinnar sýninguna.

„Við reiknuðum út að 80 prósent borgarbúa sjái sýninguna á hverjum degi,“ segir Sigurður Atli.

Þess má geta að fréttastofa tók viðtal við Isabelle Huppert þegar hún var heiðursgestur á RIFF 2023 þar sem hún fór yfir ferilinn og leiklistina. 

Ferill Huppert spannar hálfa öld og um 120 kvikmyndir. Hún braust fram á sviðið á áttunda áratugnum og var valin besta leikkonan á Cannes 1978 fyrir leik sinn í myndinni Violette Noziere.

Sjá einnig: Konur í krísu, sið­blindir síkópatar og morð­kvendi

Hennar þekktustu hlutverk eru kaldlyndi píanókennarinn Erika í The Piano Teacher (2001) og forstjórinn Michele sem lendir í hryllilegri nauðgun í Elle (2016).

Auglýsingahlé enn á ný

Þetta er í fjórða sinn sem Auglýsingahlé Billboard fer fram í byrjun árs. 

Á síðasta ári var Haraldur Jónsson neð sýninguna Ummyndanir, Sigurður Ámundason var með sýninguna Rétthermi árið 2023 og Hrafnkell Sigurðsson með Upplausn árið 2022.

Sigurjón Sighvatsson ruddi hins vegar brautina fyrir þessa tegund auglýsingaskiltasýninga hér á landi þegar hann sýndi dularfull verk undir nafninu CozYboy á 287 skjám víða um Reykjavík á milli jóla og nýárs árið 2020.