Svona var blaðamannafundur KSÍ

Sindri Sverrisson skrifar 7. febrúar 2025 10:30

Glódís Perla Viggósdóttir er fyrirliði íslenska liðsins sem er á meðal bestu þjóða Evrópu eins og staða liðsins í A-deild Þjóðadeildar sýnir. Vísir/Hulda Margrét

Þorsteinn Halldórsson, landsliðsþjálfari kvenna í fótbolta, sat fyrir svörum á blaðamannafundi í höfuðstöðvum KSÍ í dag þar sem hann kynnti nýjasta landsliðshóp sinn.

Leikmannahópinn má sjá hér neðst í greininni en mesta athygli vekur endurkoma Dagnýjar Brynjarsdóttur og Andreu Ránar Hauksdóttur.

Ísland á fyrir höndum fyrstu tvo leiki sína á nýrri leiktíð í Þjóðadeildinni og fara þeir báðir fram erlendis. Liðið sækir Sviss heim föstudaginn 21. febrúar og mætir svo Frakklandi 25. febrúar.

Upptöku frá blaðamannafundi KSÍ má sjá hér að neðan.

Klippa: Blaðamannafundur KSÍ

Fjórða liðið í riðli Íslands er Noregur sem Ísland tekur svo á móti í fyrsta heimaleik sínum 4. apríl.

Liðin leika í A-deild og kemst efsta liðið í fjögurra liða úrslit Þjóðadeildarinnar. Liðið í 2. sæti heldur sér einnig í A-deild, liðið í 4. sæti fellur í B-deild og liðið í 3. sæti fer í umspil við lið úr B-deild um sæti í A-deild. Ísland endaði í 2. sæti síns riðils í A-deildinni á síðustu leiktíð.

Leikirnir í Þjóðadeildinni eru jafnframt góður undirbúningur fyrir EM sem fram fer í Sviss í júlí. Ísland er þar einmitt, líkt og í Þjóðadeildinni, í riðli með Svisslendingum og Norðmönnum en fjórða liðið þar er svo Finnland.

Dagný Brynjarsdóttir, næstmarkahæsta landsliðskona Íslands frá upphafi, kemur á ný inn í landsliðshópinn í fyrsta sinn síðan hún eignaðist sitt annað barn fyrir um ári síðan. Hún hafði lýst yfir óánægju með samskiptaleysi af hálfu Þorsteins. Auk Dagnýjar þá snýr Andrea Rán Hauksdóttir aftur í landsliðshópinn. Andrea, sem gekk í raðir bandaríska félagsins Tampa Bay Sun síðasta sumar, lék síðast landsleiki árið 2021.

Selma Sól Magnúsdóttir og Hildur Antonsdóttir eru ekki með vegna meiðsla. Þorsteinn sagði á blaðamannafundi í dag að Selma yrði frá keppni næstu 6-8 vikurnar eftir aðgerð, og Hildur næstu 3-4 vikurnar eftir tognun í læri. Áslaug Munda Gunnlaugsdóttir er sömuleiðis ekki með núna en Guðný Árnadóttir snýr aftur eftir meiðsli.

Landsliðshópur Íslands:

Telma Ívarsdóttir - Breiðablik - 11 leikir

Fanney Inga Birkisdóttir - Valur - 7 leikir

Cecilía Rán Rúnarsdóttir - Inter Milan - 11 leikir

Guðný Árnadóttir - Kristianstads DFF - 32 leikir

Ingibjörg Sigurðardóttir - Bröndby IF - 65 leikir, 1 mark

Glódís Perla Viggósdóttir - Bayern Munich - 128 leikir, 11 mörk

Guðrún Arnardóttir - FC Rosengard - 41 leikur, 1 mark

Natasha Moraa Anasi - Valur - 6 leikir, 1 mark

Sædís Rún Heiðarsdóttir - Valerenga - 9 leikir

Sandra María Jessen - Þór/KA - 43 leikir, 6 mörk

Berglind Rós Ágústsdóttir - Valur - 12 leikir, 1 mark

Alexandra Jóhannsdóttir - ACF Fiorentina - 47 leikir, 6 mörk

Hildur Antonsdóttir - Madrid CFF - 18 leikir, 2 mörk

Katla Tryggvadóttir - Kristianstads DFF - 1 leikur

Karólína Lea Vilhjálmsdóttir - Bayer 04 Leverkusen - 43 leikir, 9 mörk

Selma Sól Magnúsdóttir - Rosenborg BK Kvinner - 41 leikur, 4 mörk

Amanda Jacobsen Andradóttir - FC Twente - 20 leikir, 2 mörk

Hafrún Rakel Halldórsdóttir - Bröndby IF - 12 leikir, 1 mark

Sveindís Jane Jónsdóttir - VfL Wolfsburg - 40 leikir, 12 mörk

Hlín Eiríksdóttir - Kristianstads DFF - 40 leikir, 6 mörk

Emilía Kiær Ásgeirsdóttir - FC Nordsjælland - 2 leikir

Diljá Ýr Zomers - OH Leuven - 16 leikir, 2 mörk

Bryndís Arna Níelsdóttir - Växjö DFF - 6 leikir, 1 mark

Landslið kvenna í fótbolta Þjóðadeild kvenna í fótbolta

Tengdar fréttir

Dagný aftur í landsliðið eftir að hafa lýst óánægju sinni

Dagný Brynjarsdóttir, miðjumaður West Ham og næstmarkahæsta landsliðskona Íslands frá upphafi, er komin inn í landsliðshóp Íslands á nýjan leik. Fyrr í vetur lýsti hún óánægju sinni með að hafa ekki fengið sæti í landsliðinu að nýju, og ekki heyrt í landsliðsþjálfaranum Þorsteini Halldórssyni frá því að hún eignaðist sitt annað barn.

7. febrúar 2025 10:57

Mest lesið

Fleiri fréttir