Dómarinn kveður Facebook með tárum

„Eins og fram hefur komið í fréttum hef ég verið settur sem héraðsdómari til ársloka. Eðli máls samkvæmt takmarkar það málfrelsi mitt á opinberum vettvangi og þátttaka í pólitísku starfi lýkur jafnframt.“

Sjálfskipaðir stjórnsýslufræðingar láta gamminn geysa

Þannig hefst einskonar kveðjupistill Brynjars. Hann segist nú vilja fylgja þessum skráðu og óskráðu reglum meðan hann starfi sem dómari. 

Brynjar getur þó ekki á sér setið í kveðjupistli sínum; hann notar tækifærið og sendir mönnum glósu og aðra:

„Stjórnsýslufræðingar, ekki síst sjálfskipaðir, hafa tekið til máls í fjölmiðlum og samfélagsmiðlum eftir að þessi tímabundna setning mín í starf héraðsdómara var kunngerð. Má ráða af þeim skrifum að ég sé meira og minna vanhæfur til dómstarfa vegna þess að ég hef verið í stjórnmálum og tjáð skoðanir á þeim vettvangi. Einnig haldið fram fullum fetum að mér hafi verið tryggð full eftirlaun dómara til æviloka með þessari setningu í starf héraðsdómara.“

Meira lesinn en miðlar sem þiggja styrki

Brynjar segir þetta úr lausu lofti gripið, í raun blanda af upplýsingaóreiðu og falsfréttum. Hann vill minna þessa sérfræðinga á að dómendum ber í embættisverkum sínum að fara einungis eftir lögunum, eins og segir í stjórnarskrá íslenska lýðveldisins. Það þýði að eigin skoðanir eða réttlæti getur ekki ráðið niðurstöðunni.

Skipan Brynjars í stöðu héraðsdómara er umdeild og þannig ritaði Ingibjörg Dögg Kjartansdóttir ritstjóri Heimildarinnar leiðara og lýsir yfir sárum vonbrigðum með skipanina. Niðurlag hennar skrifa er á þessa leið:

„Í dag búum við enn við réttarkerfi sem var mótað af körlum. Karlar settu lögin og túlkuðu þau, með þeim afleiðingum að reynsla og lífsviðhorf karla voru lögð til grundvallar réttinum. Karla sem sumir hverjir höfðu sömu viðhorf og Brynjar.“

Brynjar hins vegar lætur þetta ekki á sig fá.

„Að lokum vil ég þakka fésbókarvinum mínum og fylgjendum samfylgdina öll árin. Miðað við viðbrögðin við skrifum mínum sýnist mér þið hafið fylgst nokkuð vel með mér. Sennilega hef ég haft fleiri lesendur en miðlarnir sem fá styrkina frá skattgreiðendum en geta ekki einu sinni farið rétt með staðreyndir um eftirlaun héraðsdómara. Sennilega þarf að hækka styrkina. Takk fyrir mig í bili.“