Allt klárt fyrir úr­slita­keppnina

Ármann endar í 2. sæti deildarinnar eftir öruggan sigur á Þór Akureyri, lokatölur 124-102. Stigahæstur var Jaxson Schuler Baker með 28 stig ásamt því að taka sex fráköst og gefa sex stoðsendingar. Gestirnir frá Akureyri enda í 6. sæti.

Hamar endar í 3. sæti eftir sigur á Snæfelli í framlengdum leik, lokatölur í Hveragerði 126-118. Jaeden Edmund King var stigahæstur hjá Hamri með 38 stig. Hann tók einnig 11 fráköst og gaf 10 stoðsendingar. Snæfell endar í 8. sæti.

Sindri endar í 4. sæti eftir sigur á KFG í Garðabæ, lokatölur 87-91 í jöfnum leik. Gísli Þórarinn Hallsson var stigahæstur hjá Sindra með 23 stig. KFG endar í 12. sæti sem er jafnframt botnsætið.

Fjölnir lagði Skallagrím, 109-83, og endar í 5. sæti. Sigvaldi Eggertsson var stigahæstur hjá Fjölni með 31 stig. Þar á eftir kom Lewis Junior Diankulu með 25 stig, 12 fráköst og 8 stoðsendingar. Skallagrímur endar í 11. sæti.

Topplið ÍA tapaði þá nokkuð óvænt á Selfossi, lokatölur 115-108. Follie Bogan stigahæstur í liði heimamanna með 29 stig á meðan Skarphéðinn Árni Þorbergsson skoraði 21 stig. Kristófer Már Gíslason var stigahæstur í liði ÍA með 26 stig. 

Með sigrinum fór Selfoss í 9. sætið á kostnað KV sem tapaði með sex stiga mun gegn Breiðabliki í kvöld, lokatölur í Kópavogi 100-94. Blikar enda í 7. sæti.

Í úrslitakeppninni mætast liðin í 2. og 9. sæti, 3. og 8. sæti og svo koll af kolli. Lítill munur er á liðunum í 2. til 5. sæti og því má búast við hörku úrslitakeppni. Þá má ekki afskrifa liðin þar fyrir neðan sem hafa mörg hver reynslu úr efstu deild á undanförnum árum.

Fréttin hefur verið uppfærð.