Rekstrar­stöðvun sé yfir­vofandi á Bakka

Þetta hefur Morgunblaðið eftir Kára Marís Guðmundssyni forstjóra fyrirtækisins sem framleiðir kísilmálm og selur til útlanda. Ástæða erfiðleikanna eru aðstæður á mörkuðum að sögn Kára, sem séu mjög erfiðar nú um stundir. 

Kári hefur þegar fundað með byggðaráði Norðurþings og gert grein fyrir stöðunni en hann segir í samtali við blaðið að ef ekkert breytist á næstu vikum sé ekkert annað í stöðunni en að klára það hráefni sem fyrir liggi og fara svo í einhversskonar rekstrarstöðvun, eins og hann orðar það. Hann tekur þó fram að endanleg ákvörðun um slíkt hafi enn ekki verið tekin en ítrekar að útlitið sé mjög dökkt. 

Á þessu ári hefur PCC BakkiSilicon þegar gengið í gegnum endurskipulagningu þar sem fækkað var um tuttugu stöðugildi í starfsmannahópnum en starfsmenn eru nú um 130 að því er segir í blaðinu. Einnig verða til afleidd störf á svæðinu þannig að ljóst er að lokun verksmiðjunnar myndi hafa mikil áhrif á rekstur sveitarfélagsins Norðurþings.