Upp­gjörið: ÍBV - KA 0-0 | Ekkert samba í sólinni

ÍBV og KA gerðu markalaust jafntefli er liðin mættust í blíðskaparveðri á Þórvellinum í Vestmannaeyjum í dag.

Veðurblíðan lék við alla viðstadda á Þórsvellinum í dag og aðstæður til knattspyrnuiðkunnar voru til fyrirmyndar.

Það virtist þó ekki skila sér til leikmanna, því fyrri hálfleikur var afar bragðdaufur og bauð upp á svo gott sem engin færi.

Hvorugu liðinu tókst að skapa sér alvöru færi fyrir hlé og því var staðan enn markalaus þegar flautað var til hálfleiks og liðin gengu til búningsherbergja.

Það eina markverða sem gerðist í fyrri hálfleik var að Eyjamenn neyddust til að gera tvöfalda skiptingu eftir aðeins rúmlega tíu mínútna leik þegar Oliver Heiðarsson og Hermann Þór Ragnarsson voru teknir af velli. Vondar fréttir fyrir Eyjamenn.

Síðari hálfleikur var svo keimlíkur þeim fyrri. Bæði lið reyndu að skapa sér færi, en hvorugu liðinu tókst það.

Hættulegustu stöðurnar komu þegar Akureyringar fengu aukaspyrnur á hættulegum stað. Liðið fékk eina í fyrri hálfleik og tvær í seinni, en engin þeirra fór á markið. Hallgrímur Mar tók allar spyrnurnar. Sú fyrsta fór í varnarmann, önnur í vegginn og sú þriðja yfir.

Hvorugu liðinu tókst hins vegar að koma boltanum í netið og niðurstaðan varð því markalaust jafntefli í heldur bragðdaufum leik.

Atvik leiksins

Í raun mjög fá atvik í leiknum sem tekur því að minnast á. Það að ÍBV hafi neyðst til að gera tvöfalda skiptingu strax á 11. mínútu leiksins er þó eitthvað sem Eyjamenn vildu ekki sjá. Oliver Heiðarsson virtist nokkuð kvalinn þegar hann fór af velli og það gætu verið vondar fréttir fyrir ÍBV.

Stjörnur og skúrkar  

Þetta var bara þannig leikur að það er varla hægt að velja stjörnur og skúrka. Það var í raun enginn sem skaraði eitthvað fram úr og að sama skapi var líklega enginn sem var eitthvað mikið verri en aðrir.

Dómarinn

Vilhjálmur Alvar Þórarinsson og hans teymi átti fínasta dag í Eyjum í dag. Leikurinn fékk að fljóta nokkuð vel og lítið hægt að setja út á dómgæslu. KA-menn vildu vissulega fá víti í fyrri hálfleik þegar boltinn fór í höndina á Mattias Edeland, en líklega var rétt hjá Vilhjálmi að sleppa því.

Stemning og umgjörð

Það er ekkert hægt að setja út á aðstæðurnar í Eyjum í dag. Gamla góða bongóblíðan og allt upp á tíu á Þórsvellinum. Vantaði bara skemmtilegri fótboltaleik.