Tók við MVP-styttunni og skoraði svo 38 stig

Fyrir leikinn veitti Shai Gilgeous-Alexander styttunni fyrir að vera valinn verðmætasti leikmaður deildarinnar (MVP) viðtöku. Hann hélt upp á það með því að skora 38 stig í leiknum.

Gilgeous-Alexander hitti úr tólf af 21 skoti sínu utan af velli og skoraði þrettán stig af vítalínunni. Hann gaf einnig átta stoðsendingar. Jalen Williams skoraði 26 stig og tók tíu fráköst og Chet Holmgren var með 22 stig.

Anthony Edwards skoraði 32 stig fyrir Minnesota, tók níu fráköst og gaf sex stoðsendingar. Jaden McDaniels skoraði 22 stig en Julius Randle, sem hefur leikið svo vel í úrslitakeppninni, var einungis með sex stig og hitti bara úr tveimur af þeim ellefu skotum sem hann reyndi.

Næstu tveir leikir einvígisins fara fram í Minnesota en þar verða Úlfarnir að svara fyrir sig.