Bara fjögur útilið hafa unnið odda­leik um NBA titilinn

Þetta er tuttugasti hreini úrslitaleikurinn um NBA titilinn en jafnframt sá fyrsti í níu ár.

Þessi veisla verður sýnd beint á Sýn Sport 2 í kvöld og hefst upphitunin klukkan 23.30 en leikurinn rétt eftir miðnætti.

Indiana Pacers hefur komið mörgum á óvart með frammistöðu sinni í úrslitakeppninni og tryggði sér oddaleik með sannfærandi sigri í leik sex. Liðið hefur hvað eftir annað verið afskrifað en kemur alltaf til baka.

Í kvöld er liðið aftur á móti á útivelli í Oklahoma City og sagan er ekki með þeim þar.

Þetta er tuttugasti oddaleikurinn um NBA titilinn en aðeins fjórum sinnum hefur útiliðið náð að vinna. Heimaliðin hafa unnið 15 af 19 leikjum eða 79 prósent oddaleikjanna.

Eitt af þeim sem hefur fagnað sigri á útivelli er lið Cleveland Cavaliers sem fagnaði sigri í síðasta oddaleik um titilinn sem fór fram árið 2016. Cleveland vann þá fjögurra stiga sigur á Golen State Warriors á útivelli, 93-89, þar sem LeBron James var með þrefalda tvennu, skoraði 27 stig, tók 11 fráköst og gaf 11 stoðsendingar.

Hin þrjú útiliðin til að vinna oddaleik um titilinn eru Washington Bullets 1978, Boston Celtics 1974 og Boston Celtics 1969. Síðastnefnda Boston liðið var með Bill Russell sem spilandi þjálfara.

Bill Russell vann þá NBA titilinn í ellefta skiptið á þrettán árum en þetta var hans síðasti leikur á ferlinum.