Norð­menn græddu á því að halda HM í hand­bolta

Framkvæmdastjóri norska handboltasambandsins segir að Norðmenn hafi grætt pening á því að halda HM í handbolta.

Norðmenn héldu mótið ásamt Dönum og Króötum. Noregur var með tvo riðla, einn milliriðil, tvo leiki í átta liða úrslitum, annan undanúrslitaleikinn og svo alla báða leikina um verðlaun.

Það gekk reyndar ekki nógu vel hjá norska landsliðinu sjálfu sem komst ekki í átta liða úrslitin. Það var aftur á móti fullt hús í Bærum þegar Danir tryggðu sér heimsmeistaratitilinn með sigri á Degi Sigurðssyni og lærisveinum hans í króatíska landsliðinu.

Nú eru Norðmenn komnir langt með að gera upp reikninga frá mótinu og það lítur út fyrir að norska sambandið græði 3,1 milljónir norskra króna eða rúmar 36 milljónir íslenskra króna á að halda mótið.

„Þetta er frábær útkoma og hún kom til vegna þess að miðasalan gekk vel og við héldum vel utan um allan kostnað,“ sagði Erik Langerud, framkvæmdastjóri norska sambandsins við Verdens Gang.

Kåre Geir Lio, forseti norska handboltasambandsins, hafði reyndar búist við því í febrúar að sambandið kæmi út í mínus en við nánari skoðun var staðreyndin sú að það komu 60,7 milljónir norskra króna í kassann en kostnaðurinn var 57,6 milljónir norskra króna.

Það kostaði bara fimmtán milljónir norskra króna að setja upp höllina í Bærum en norska sambandið naut góðs af því að fá tíu milljónir norskra króna í styrk frá norsku ríkisstjórninni og fimm milljóna norskra króna styrk frá bæjarstjórn Bærum.

„Það skipti öllu máli fyrir okkur,“ sagði Langerud.