Flagg fer til Dallas

Dallas setti met í heppni þegar liðið vann nýliðalottóið með aðeins 1,8 prósent sigurlíkur, skömmu eftir að hafa mjög óvænt skipt stærstu stjörnu liðsins til Los Angeles Lakers.

Svo ótrúlegt þótti það, að NBA sérfræðingar voru handvissir um að engin heppni hefði verið á ferðum, heldur svindl.

Hverju sem líður fékk Dallas fyrsta valréttinn og aldrei var spurning um hver yrði fyrir valinu.

Sá heitir Cooper Flagg og hefur verið í efsta sæti á öllum nýliðalistum síðan hann útskrifaðist úr menntaskóla ári fyrr og fór í háskólann Duke. Sex feta og átta tommu hái framherjinn verður nítján ára næstkomandi desember.

Hann gengur til liðs við lið sem missti af úrslitakeppninni á síðasta tímabili eftir að hafa misst lykilmenn í meiðsli. ESPN reiknar með honum í byrjunarliðinu á næsta tímabili, í stöðu skotframherja, með kraftframherjanum Anthony Davis og öðrum hvorum miðherjunum, Dereck Lively eða Daniel Gafford.

Leikstjórnandi liðsins, Kyrie Irving, sleit krossband í mars síðastliðnum og mun missa af fyrri hluta næsta tímabils en er væntanlegur um eða eftir áramótin.

Þeir gætu þá orðið þrír, leikmenn Dallas sem komu úr Duke háskólanum. Kyrie Irving kom þaðan og var valinn fyrstur í nýliðavalinu árið 2011, Dereck Lively einnig en var valinn tólfti af Dallas árið 2023.