Varar við því að stór­virkjun í Skaga­firði verði úti­lokuð

Í fréttum Sýnar mátti heyra ólík sjónarmið um orkumálin. Í nýrri tillögu meirihluta umhverfis- og samgöngunefndar Alþingis að flokkun fimm virkjanakosta líst forstjóra Landsvirkjunar verst á þau áform stjórnarflokkanna að setja Héraðsvötn með Skatastaðavirkjun í verndarflokk.

„Við teljum að það sé skynsamlegt, eins og með Skatastaði, að sá kostur sé settur í biðflokk til þess að það sé skoðað betur,“ segir Hörður Arnarson.

„Það er ljóst að orkuöflunarviljinn, orkuþörf samfélagsins, er mun meiri en menn töldu áður fyrir endurnýjanlega orku. Og það er hættulegt ef við setjum tiltölulega góða kosti í verndarflokk,“ segir forstjóri Landsvirkjunar.

Hann telur unnt í umhverfismati að sýna fram á að Skatastaðavirkjun sé ásættanleg. Auk þess segir hann virkjunina mikilvæga fyrir orkuöryggi í landinu.

„Því þetta er svona eini stóri vatnsaflskosturinn sem er fyrir utan eldvirk svæði. Hún yrði þá líka eiginlega eini kosturinn sem væri í Skagafirði, sem yrði þá líka mikil lyftistöng fyrir samfélagið,“ segir Hörður.

Stærstu athugasemdir Landverndar lúta að því að Kjalölduveita sé sett í biðflokk í stað verndar.

„Og það eru ekki bara athugasemdir Landverndar heldur er þar í rauninni verið að fara aftur gegn tillögum rammaáætlunar, sem hefur ítrekað komist að sömu niðurstöðu. Sem er að þetta eigi að fara í vernd. Þannig að það finnst okkur dálítið skuggalegt,“ segir Björg Eva Erlendsdóttir, framkvæmdastjóri Landverndar, og minnir á að rammaáætlun telji Kjalölduveitu vera Norðlingaölduveitu og varða Þjórsárver.

Forstjóri Landsvirkjunar telur á móti jákvætt að Kjalölduveita sé ekki útilokuð.

„Kjalölduveita er hagkvæmasti kosturinn, sem hefur að okkar mati mjög lítil umhverfisáhrif. Hún er langt frá Þjórsárverum, sem er náttúrlega mjög mikilvægt að vernda. Og það er algjörlega útilokað að Kjalölduveita hafi áhrif á Þjórsárverin,“ segir Hörður.

Björg Eva segir veituna einnig skaða fossa Efri Þjórsár.

„Það tekur vatnið úr einni flottustu stórfossaröð landsins, Dynk, sem Ómar Ragnarsson kom nú vel á kortið á sínum tíma,“ segir Björg Eva og nefnir einnig Gljúfurleitarfoss og Hvanngiljafoss.

Landsvirkjun virðist þó hafa nóg að gera á næstu árum.

„Við erum að fara af stað með nokkur öflug verkefni núna. Við erum komin af stað með Vaðölduver og erum vonandi að komast af stað með Hvammsvirkjun og stækkun Sigölduvirkjunar og Þeistareykjavirkjunar. Þannig að það má segja að við höfum ágæta verkefnastöðu til að mæta þörf svona fram til ársins 2030,“ segir Hörður.

Talsmaður Landverndar segir ofboðslegan orkuþrýsting í umræðunni.

„Það er bara allsstaðar uppi alveg svakaleg plön um orkuöflun. Ég held að menn þurfi bara að flýta sér hægt og skoða þessi mál. Og þar eru vindorkuverin heldur ekki undanskilin,“ segir Björg Eva.