Erlent

Þriðjungur endur­reisnarinnar gæti fallið á Rússa

Hólmfríður Gísladóttir skrifar
Menn hefja viðgerðir á blokk eftir drónaárás Rússa.
Menn hefja viðgerðir á blokk eftir drónaárás Rússa. epa/Yuri Kochetkov

Alþjóðabankinn áætlar að tíu ára enduruppbygging Úkraínu muni kosta um það bil 524 milljarða dala en færi svo að Rússum yrði að ósk sinni og þeir fengju þau svæði sem þeir hafa nú þegar lagt undir sig í friðarsamningum, myndu tæplega 200 milljarðar dala falla á þá.

Ítalska hugveitan Institute for International Political Studies hefur áætlað út frá rannsóknum Alþjóðabankans að endurreisn umræddra svæða; Donetsk, Luhansk, Zaporizhzhia og Kherson, muni krefjast 188 milljarða dala fjárfestingar.

Samkvæmt þessari sviðsmynd myndu Úkraínumenn ekki aðeins standa frammi fyrir pólitískri sundrung, heldur mögulega verulegri fjárhagslegri misskiptingu, þar sem íbúar á svæðunum fjórum myndu búa við bágari aðstæður en aðrir landsmenn.

Þess ber að geta í þessu samhengi að Úkraínumenn hafa ekki fallist á kröfur Rússa um að þeir gefi eftir hernumda landsvæðið.

Evrópuleiðtogar eru nú staddir í Róm á ráðstefnu um endurreisn Úkraínu, sem er í mikilli óvissu eins og sakir standa. Vopnahlésviðræður hafa að stóru leyti strandað á kergju Rússa til að komast að málamiðlun og þá hafa síðarnefndu gefið í árásir sínar á borgir Úkraínu síðustu daga og vikur.




Fleiri fréttir

Sjá meira


×