Tekjur jukust um helming milli ára

Í fréttatilkynningu þess efnis segir að ársreikningur samstæðunnar hafi verið samþykktur á aðalfundi í júní. Undanfarin tvö ár hafi rekstur Arctic Trucks International tekið jákvæðum breytingum eftir að áherslur móðurfélagsins og dótturfélaga þess voru skerptar. Tekjustoðum hafi meðal annars verið fjölgað með nýjum vörum og fjölgun sérleyfishafa.

„Síðasta ár gekk afar vel hjá Arctic Trucks International. Þá bar hæst þróun á Toyota Landcruiser 250 AT37 (Arctic Trucks 37“) og að Arctic Trucks hófu framleiðslu í Svíþjóð. Okkar sýn er alltaf sú sama, að þróa breytingalausnir fyrir jeppa sem gera torsótt og afskekkt svæði heimsins aðgengilegri fyrir fólk og það er búið að vera frábært að sjá hvað við getum gert það á fjölbreyttan hátt um allan heim,“ er haft eftir Sveini Friðriki Sveinssyni, rekstrarstjóra Arctic Trucks International.

Þá segir að starfsemi félagsins byggi á þremur megineiningum:

• Sérhæfðar breytingar á jeppum, sem séu seldar í gegnum alþjóðlegt sérleyfiskerfi í löndum á borð við Noreg, Ísland, Bretland, Norður-Ameríku, Sameinuðu Arabísku furstadæmunum, Suður-Afríku og nýverið Svíþjóð.
• Arctic Trucks UK, sem reki sjálfstæða starfsemi í Bretlandi á sviði bílabreytinga sem sérleyfishafi.
• Arctic Trucks Polar, sem sérhæfi sig í leiðöngrum á Suðurskautinu. Þar reki fyrirtækið eigin bílaflota og annist ferðir fyrir vísindastofnanir auk einkaleiðangra, meðal annars fyrir bílaframleiðendur.

Stærsti eigandi félagsins er sjóðurinn Frumtak 2 slhf., sem er að mestu í eigu lífeyrissjóða, með 44 prósenta hlut. Emil Grímsson, stofnandi félagsins og stjórnarformaður, á 31 prósenta hlut og Birkir Kristinsson á 12 prósenta hlut.