„Aug­ljós­lega þurfum við fleiri leik­menn“

Fernandes var heilt yfir ánægður með æfingaferð liðsins til Bandaríkjanna. Manchester United vann sumaræfingamót ensku úrvalsdeildarinnar sem var haldið þar í landi, þrátt fyrir að hafa gert 2-2 jafntefli gegn Everton í gærkvöldi.

„Þetta hefur verið fín ferð og góð tengslamyndun fyrir hópinn en við litum letilega út í dag og verðum að breyta því“ sagði Fernandes við Sky Sports eftir leikinn.

„Ég vil ekki kalla neinn út sérstaklega, það er ekki mitt hlutverk, en augljóslega þurfum við fleiri leikmenn og meiri samkeppni um stöðurnar. Við þurfum gæðaleikmenn svo allir geti stigið framfaraskref og barist harðar fyrir sínu sæti í liðinu.

Ég held að félagið og stjórinn séu að reyna það og vonandi getum við fengum einn eða tvo leikmenn til að hjálpa“ hélt hann svo áfram en viðtalið í heild sinni á sjá hér fyrir neðan.

Fernandes kom United yfir með marki úr vítaspyrnu í leiknum gegn Everton í gær en Illiman Ndiaye jafnaði rétt fyrir hálfleik.

Fernandes lagði svo annað mark United upp fyrir Mason Mount en Ayden Heaven setti boltann svo óvart í eigið net og 2-2 jafntefli varð niðurstaðan.

Leikurinn var sá fyrsti hjá Bryan Mbeumo hjá Manchester United en hann komst ekki á blað. Öll helstu atvik leiksins má sjá hér fyrir neðan.

United vann West Ham og Bournemouth áður á æfingamótinu og stóð uppi sem sigurvegari Premier League Summer Series. Enska úrvalsdeildin hefst svo um þarnæstu helgi, United á fyrst leik gegn Arsenal sunnudaginn 17. ágúst.