Skýrsla Vals: Illt í sálinni

Þetta er skrifað skömmu eftir að lokaflautið gall í Katowice á EM í körfubolta. Pólsk samstarfskona við hlið mér í blaðamannastúkunni var að ljúka við að rífa upp öll sín skrif um fyrsta sigur í sögu Íslands á EM.

Stuðningsmenn sem voru svo glaðir, spenntir og öskrandi liðið áfram fyrir örskotsstundu, eru niðurlútir, einhverjir með tár á kvarmi.

Á einhvern ótrúlegan hátt tókst strákunum okkar ekki að ná í þennan fyrsta sigur.

Það er hreint makalaust. En svona gerist þegar mönnum tekst ekki að hamra járnið meðan það er heitt. Þessi leikur hefði átt að vera búinn löngu fyrr. Frá upphafi reyndist erfitt að tengja saman góða vörn og sókn og aldrei tókst að slíta Belga almennilega frá sér.

Það voru sannarlega tækifæri. Sérstaklega þegar stúkan komst í fimmta gír í lok þriðja leikhluta og byrjun þess fjórða. Belgar voru bognir og alveg við að brotna á þessum augnablikum en tækifærinu kastað á glæ, ítrekað.

Belgía hafði leitt leikinn í 75 sekúndur alls fyrir lokahluta leiksins. Í heildina voru þeir með forystuna í 141 sekúndu í þessum leik. Og þeir unnu hann! Strákarnir reyndu hvað þeir gátu en misstu hreinlega hausinn undir lokin.

23. ágúst 1967 tapaði karlalandsliðið í fótbolta 14-2 fyrir Dönum. Þann 30. ágúst 2025 tapaði landsliðið í körfubolta síðustu fimm mínútum leiksins 16-2 fyrir þessu bogna belgíska liði.

Ég skil ekki alveg hvernig.

Það virðist sem þessi hjalli – að vinna loksins leik á stórmóti – vegi þyngra á öxlum landsliðsmannana en maður gerði sér grein fyrir. Þrátt fyrir að munurinn hafi aldrei orðið eins mikill og maður vonaðist eftir virtist samt aldrei líklegt, af hálfu Belga, að þeir myndu snúa þessu við.

Trylltur Tryggvi Snær var langbesti maður Íslands í dag en ljóst er að of mikið liggur á herðum örfárra leikmanna. Tryggvi, Martin, Elvar og Kristinn með 32 af 36 stigum í fyrri hálfleik. Fátt kom af bekknum og þá er nýtingin fyrir utan þriggja stiga línuna aum 14 prósent.

Strákarnir lögðu allt í þetta og verður ekki sakast við vinnuframlagið og orkustigið. En þetta svíður alveg hrikalega og maður finnur hvað helst til með stuðningsmönnum Íslands sem voru töluvert fleiri í dag en á fimmtudaginn var.

Þeir rifu liðið áfram. Allir stóðu frá upphafi til enda í fjórða leikhlutanum, en þeir sitja eftir, líkt og maður sjálfur, hálf flökurt, með ævintýralegan sting í maganum eftir þetta þunga högg.