Síminn má dreifa efni Sýnar

Í ágúst komst Fjarskiptastofa að þeirri bráðabirgðaniðurstöðu að Sýn sé skylt að dreifa línulegu sjónvarpsefni inn á lokað kerfi Símans. Sýn mótmælti þeirri niðurstöðu og vísaði málinu til úrskurðanefndar fjarskipta- og póstmála. Í fréttatilkynningu frá Símanum segir að úrskurðanefndin hafni kröfu Sýnar.

Áskrifendur Símans geta því áfram keypt pakka hjá Símanum sem veita aðgang að línulegu íþróttaefni Sýnar ásamt því að horfa á línulega dagskrá á sjónvarpsstöð Sýnar. Hins vegar verður ekki hægt að horfa á streymisveitum SÝN+ og Viaplay eða ólínulegu efni frá Sýn Sport.

„Áhorfendur í nútímasamfélagi vilja hafa val um hvar þeir nálgast sínar útsendingar. Í takt við áherslur um aðgengi og þægindi neytenda voru útsendingar enska boltans aðgengilegar á dreifikerfi Sýnar þegar Síminn hélt á sýningarréttinum. Úrskurður nefndarinnar, sem staðfestir ákvörðun Fjarskiptastofu, er því mikilvægur áfangi bæði fyrir Símann og neytendur,“ er haft eftir Maríu Björk Einarsdóttur, forstjóra Símans í tilkynningunni.

Fjarskiptastofa hefur til 1. desember til að taka endanlega ákvörðun í málinu. 

Vísir er í eigu Sýnar.