Handbolti

Stjarnan vann háspennuleik gegn HK

Ágúst Orri Arnarson skrifar
Benedikt Marinó skoraði sigurmark Stjörnunnar á lokasekúndum leiksins.
Benedikt Marinó skoraði sigurmark Stjörnunnar á lokasekúndum leiksins.

Stjarnan fagnaði sínum fyrsta sigri í Olís deild karla í handbolta eftir æsispennandi leik gegn HK. Lokatölur í Garðabænum 26-25 eftir sannkallaðan spennutrylli.

Mikið jafnræði var með liðunum, þó þau hafi bæði átt sína spretti og skipst á að taka forystuna. Þegar þrjár mínútur voru til leiksloka stóð staðan jöfn 24-24.

Þá tók við æsispennandi endasprettur þar sem Gauti Gunnarsson kom Stjörnunni yfir, en Haukur Ingi Hauksson náði að jafna fyrir HK.

Stjörnumenn tóku þá leikhlé og höfðu sléttar þrjátíu sekúndur til að skora sigurmarkið, sem Benedikt Marínó Herdísarson gerði með bylmingsskoti utan af miðju.

Þetta var fyrsti sigur Stjörnunnar á tímabilinu en þriðja tap HK í jafnmörgum leikjum. HK-ingar eru því neðstir í Olís deildinni en Stjarnan stekkur upp í níunda sætið.

Sigurður Dan Óskarsson átti góðan leik í marki Stjörnunnar og varði 17 af 42 skotum (40.5 prósent), þar af eitt víti, auk þess að gefa eina stoðsendingu.

Ísak Logi Einarsson skoraði mest fyrir Stjörnuna, sex mörk úr tólf skotum, en sá hittnasti hjá heimamönnum var Jón Ásgeir Eyjólfsson sem skoraði fjögur mörk með fullkominni skotnýtingu.

Sem er þó ekki alveg eins gott og hjá Sigurði Jefferson Guarino, sem skoraði sex mörk úr sex skotum fyrir HK.


Tengdar fréttir

Valur sótti nauman sigur norður

Valur slapp með 27-26 sigur eftir að hafa glutrað góðri forystu gegn Þór á Akureyri í þriðju umferð Olís deildar karla.




Fleiri fréttir

Sjá meira


×