Play með sex prósent flugsæta til og frá landinu

Play tilkynnti í gær að félagið hefði hætt starfsemi og væri á leið í gjaldþrotameðferð. Beiðni um gjaldþrot var lögð fyrir Héraðsdómi Reykjavíkur í dag.

Samkvæmt upplýsingum frá Isavia átti Play um tólf prósent af framboði til og frá Keflavíkurflugvelli í september.

Í skriflegu svari frá Isavia kemur fram að ef horft er á tímabilið frá október 2025 til og með ágúst 2026 þá var Play með 5,8% af öllum flugsætum í sölu miðað við þá áætlun sem félagið gaf út fyrir nokkrum mánuðum.

„Það hlutfall hefði vissulega getað lækkað ef önnur félög hefðu aukið við framboð sitt t.d. á sumaráætlun 2026 en þær áætlanir eru tilbúnar í desember næstkomandi. Play hefði því, þrátt fyrir breytta viðskiptalíkan verið næststærsti viðskiptavinur okkar en ekki langt frá félögum á borð við easyJet og Wizz,“ segir Guðjón.

Play var með 21 áfangastað í áætlun sinni og þar af níu áfangastaði sem ekkert annað flugfélag flýgur til frá Íslandi í október. Áfangastaðirnir eru Antalya í Tyrklandi, Faro, Funchal og Porto í Portúgal, Liverpool á Englandi, Madrid á Spáni, Marrakech í Marokkó, Split í Króatíu og Vilníus í Litháen.

Guðjón segir Isavia eiga í góðu samtali við flugfélög sem fljúga um KEF um hvort þau stígi inn þar sem Play var að fljúga. Viðbætur í þá átt yrðu þó væntanlega ekki fyrr en næsta sumar.