Tútturnar úti á Grammy-hátíðinni

Hér verður farið yfir nokkur skemmtileg og frumleg klæði frá kvöldinu. 

Túttukjóll

Chappell Roan var hvað frumlegust í klæðaburði en hún var í einstökum kjól þar sem brjóstin voru út og klæðin tengdust við geirvörtulokkana hennar en á myndum að dæma virðist hún líka hafa sett smá efnisbút yfir geirvörturnar. 

Þessi djörfu og flottu klæði voru sérhönnuð á hana frá tískuhúsinu Mugler og hún var sömuleiðis með sjal yfir sig ef henni skyldi verða kalt. 

 Lady Gaga stælar Björk

Tónlistardrottningin Lady Gaga virðist hafa fengið mikinn innblástur frá Björk okkar Guðmundsdóttur þegar hún steig á svið á hátíðinni í gær. 

Gaga rokkaði klæði frá tískuhúsinu McQueen frá árinu 2009 en Björk var einmitt ein af listagyðjum McQueen og áberandi í klæðum frá vini sínum Alexander McQueen sem féll frá árið 2010. 

Heidi Klum í nektarkjól

Ofurfyrirsætan og stuðboltinn Heidi Klum rokkaði svokallaðan nektarkjól eða „nude dress“ í gær en kjóllinn er sérsaumaður á hana og úr smiðju þýska tískuhússins Marina Hermansera.  

Laufey sigurvegari í MiuMiu

Laufey Lín súperstjarnan okkar Íslendinga var svo stórglæsileg í ljósfjólubláum kjól frá ítalska tískuhúsinu MiuMiu. Þvílíkur sigurvegari! 

 Sabrina sæta

Sabrina Carpenter er æðisleg poppsöngkona, stemningsskvísa og býr yfir miklum þokka. Hún skein skært í sérsaumuðum galagellukjól frá hátískuhúsinu Valentino og heiðraði minningu Valentino sjálfs sem féll nýverið frá. 

Splunkuný stjarna

Rokkarinn og rísandi stjarnan Sombr steig á svið í sérsaumuðum pallíettujakkafötum frá Valentino. Hann var tilnefndur sem besti nýi listamaðurinn og var ekkert eðlilega mikill skvísutöffari. 

Kendrick Lamar mætti á svæðið

Rapparinn Kendrick Lamar var ótrúlega elegant í Chanel jakkafötum en hann er líka bara alltaf smart! 

Bleikt Louis þríeyki

Tónlistarmennirnir Pharrell Williams, Pusha T og Malice rokkuðu bleik jakkaföt frá franska tískuhúsinu Louis Vuitton en Pharrell er einmitt listrænn stjórnandi herradeildarinnar þar. Algjörir töffarar.

Fröken frumlegust

Rapparinn og tónlistarkonan Audrey Nuna rokkaði fáránlega flott og frumlegt fitt frá Thom Browne. 

Í fanta formi

Teyana Taylor ber undantekningalaust af á rauða dreglinum.

Þvílíka bomban í Tom Ford kjól eftir hönnuðinn Haider Ackermann.