„Við þekkjum um­hverfið alla­vega betur“

„Þetta leggst mjög vel í mig. Undirbúningurinn hefur verið frábær og flestar eru klárar, þannig að ég held að þetta muni bara ganga vel hjá okkur“ sagði Þorleifur.

Isabella Ósk Sigurðardóttir er að glíma við smávægileg meiðsli en aðrir leikmenn liðsins eru heilir heilsu, að sögn Þorleifs.

Grindavík hefur fagnað góðu gengi í Bónus deildinni á þessu tímabili og situr í efsta sæti deildarinnar, og þó bikarinn sé allt önnur keppni mun það eflaust hjálpa liðinu.

„Þetta eru alveg aðskildar keppnir en við höfum verið að bæta okkar leik í deildinni og spiluðum líka nýlega við Tindastól. Lentum í smá brasi þar en náðum að klára þann leik og við munum alveg nýta okkur það, það er klárlega eitthvað sem hjálpar okkur í kvöld“ sagði Þorleifur.

Undanúrslitin og úrslitaleikurinn fer fram í Smáranum, sem var heimavöllur Grindavíkur síðustu tvö tímabil þegar liðið gat ekki spilað í heimabænum.

„Skiptir kannski ekki öllu máli hvar maður spilar en okkur leið alltaf vel í Smáranum og vonandi mun það hjálpa. Við þekkjum umhverfið allavega betur en annars staðar.“

Tindastóll tók á móti Grindavík í þarsíðustu umferð Bónus deildarinnar og þar sluppu Grindvíkingar með þriggja stiga sigur eftir háspennuleik.

Hvað lærðuð þið af þeim leik?

„Hversu öflugt Tindastólsliðið er í raun og veru. Þær eru með hörkulið og eru að breyta um leikmann, þannig að við verðum að vera á tánum og klárar í að byrja mjög vel, það verður mikilvægt fyrir okkur“ sagði Þorleifur að lokum.