Vatn frá Ölfusi í sádiara­bískri íþróttaþvotta­vél

Cleeks, lið Martins Kaymer, tilkynnti um samstarfið við Icelandic Glacial áður en opnunarmót LIV-tímabilsins í Ríad í Sádi-Arabíu hófst í síðustu viku. 

Í tilkynningu á vefsíðu liðsins segir að Icelandic Glacial verði „samþættað ímynd Cleeks-golfklúbbsins á vellinum“. Þannig verði vörumerki íslenska fyrirtækisins á pokum liðsmanna.

Haft er eftir Reza Mirza, forstjóra Icelandic Glacial, að skýrleiki skipti mestu máli þegar mest á ríður.

„Að vinna með Cleeks-golfklúbbnum leyfir okkur að birtast á stundum þar sem skýrleiki er ekki bara hugmynd heldur nauðsyn,“ segir Mirza.

Icelandic Glacial tappar íslensku vatni á flöskur í Ölfusi. Stærstu eigendur fyrirtækisins eru þó erlendir. Sá stærsti er Iceland Star Property, skráð í Liechtenstein, sem Jón Ólafsson, stofnandi fyrirtækisins sagði í eigu alþjóðlegs hóps fjárfesta árið 2023. Næststærsti eigandi er bandaríski fjárfestingasjóðurinn Blackrock.

Íslenska vatnið virðist ekki hafa hjálpað Kaymer og félögum að vera skýrir í kollinum í Ríad. Cleeks enduðu í næstneðsta sæti í liðakeppninni. Adrian Meronk var efstur Cleeks-manna í einstaklingskeppninni, jafn í 27. sæti af 57 keppendum. Richard Bland og Victor Perez höfnuðu í 54. og 55. sæti.