Aron verður aðstoðarþjálfari FH

Í tilkynningu FH kemur fram að núverandi aðstoðarþjálfari, Einar Andri Einarsson, verði áfram í þjálfarateymi liðsins, sem Sigursteinn Arndal stýrir, en muni í auknum mæli taka að sér önnur verkefni hjá handknattleiksdeildinni.

Aron Pálmarsson þarf vart að kynna en hann er einn sigursælasti handboltamaður sem Ísland hefur alið af sér og varð Íslandsmeistari með uppeldisfélagi sínu FH árið 2024, en lagði skóna á hilluna síðastliðið vor.

Í júlí 2025 var Aron ráðinn til starfa sem sérlegur faglegur ráðgjafi handknattleiksdeildar FH, en hann er nú boðinn velkominn í nýtt hlutverk í Kaplakrika.

Aron var spurður í september 2025, í þættinum Big Ben, hvort hann sæi fyrir sér að gerast þjálfari einhvern tímann. Þá svaraði hann því harðneitandi, en hefur greinilega snúist hugur. Innslagið úr þættinum má sjá í spilaranum að ofan.