Eitrað fyrir Navalní með froskaeitri

Breska ríkisútvarpið hefur eftir utanríkisráðuneyti Bretlands að engar eðlilegar útskýringar geti verið fyrir því að eitrið hafi fundist á og í líki Navalnís. Þá sagði Yvette Cooper, utanríkisráðherra, í morgun að einungis yfirvöld í Rússlandi hefðu bæði getu og tilefni til að eitra fyrir Navalní í fanganýlendunni í Rússlandi.

Júlía Navalní, eiginkona Alexeis, hélt því fram í fyrra að eitrað hefði verið fyrir eiginmanni hennar. Hún sagði þó ekki hvaða eitur hafi verið notað.

Yfirvöld í Svíþjóð, Frakklandi, Hollandi og Þýskalandi, hafa einnig haldið þessu fram.

Eins og frægt er dó Navalní í fangelsi í Rússlandi. Hann hafði þá setið í fangelsi frá árinu 2021, þegar hann hlaut tveggja og hálfs árs dóm fyrir að rjúfa skilorð vegna dóms frá 2014, sem Mannréttindadómstóll Evrópu hefur sagt gerræðislegan.

Ástæða þess að hann braut skilorðið var þó sú að eitrað hafði verið fyrir honum og hann lá við dauðans dyr á sjúkrahúsi í Þýskalandi. Navalní sakar Vladimír Pútin, forseta Rússlands, um að bera ábyrgð á eitruninni en notast var við taugaeitrið Novichok, sem einnig var notað til að eitra fyrir fyrrverandi njósnaranum Sergei Skripal og dóttur hans.

Þrátt fyrir að eitrað hafi verið fyrir honum sneri Navalní aftur til Rússlands og var hann handtekinn strax eftir lendingu.

Þegar hann dó hafði hann farið í göngutúr í fanganýlendunni sem er í norðanverðri Síberíu. Eftir göngutúrinn missti hann meðvitund og vaknaði aldrei aftur.

Nokkrum dögum síðar heiðraði Vladimír Pútín, forseti Rússlands, fangelsismálastjóra Rússlands og hækkaði hann í tign.

Um þetta leyti var unnið að umfangsmiklum fangaskiptum milli Bandaríkjamanna og Rússa og vildu þeir fyrrnefndu að Navalní yrði frelsaður í þeim fangaskiptum. Um var að ræða umfangsmestu fangaskipti á milli Rússlands og vestrænna ríkja frá lokum kalda stríðsins.

Sextán fangar í rússneskum fangelsum fengu þá frelsi í skiptum fyrir átta Rússa sem sátu í fangelsum í Bandaríkjunum og Evrópu.