Tennisstjörnur neyðast til að gerast græn­metis­ætur

Mótið hefst á mánudag í Acapulco í Mexíkó og í tilkynningu sem var send keppendum kemur fram að annars konar hágæða prótín verði á boðstólnum, en ekki kjöt, vegna þess að þannig eykst áhættan á því að falla á lyfjaprófi.

Þessi varúðarráðstöfun er gerð því alþjóða lyfjaeftirlitið hefur varað við því að sterar séu notaðir til að auka kjötframleiðslu í Mexíkó og Kólumbíu.

Svoleiðis mál hafa komið upp áður. Á síðasta ári féll tenniskappinn Nicolas Zanellato á lyfjaprófi en var ekki dæmdur í bann því orsökin var sterasmitað kjöt sem hann borðaði í keppni í Kólumbíu.

Breska tenniskonan Tara Moore féll líka á lyfjaprófi árið 2022 af sömu ástæðum, hún var dæmd í ótímabundið bann en nítján mánuðum síðar var það fellt úr gildi.

Svo urðu líka þrír tenniskappar fyrir matareitrun á Opna meistaramótinu í Mexíkó á síðasta ári, en féllu ekki á lyfjaprófi.