Leik lokið: Haukar-Fram 32-29 | Haukakonur aftur í bikarúrslitin

Haukakonur tryggðu sér sæti í bikarúrslitaleik kvenna í handbolta eftir þriggja marka sigur á Fram, 32-29, í undanúrslitaleik Powerade-bikars kvenna á Ásvöllum í kvöld. 

Haukar unnu einmitt Fram í bikarúrslitaleiknum fyrir ári síðan og mæta nú annaðhvort Val eða KA/Þór í úrslitaleiknum á laugardaginn en seinni undanúrslitaleikurinn fer fram seinna í kvöld. 

Fram var sterkari aðilinn framan af í fyrri hálfleik og voru Haukar lengst af í eltingaleik við að jafna leikinn. 14-14 var staðan er flautað var til hálfleiks.

Síðari hálfleikur var jafn, en nú voru það Framarar sem þurftu að hafa fyrir því að jafna leikinn í hverri sókn.

 Þegar leið á hálfleikinn náðu Haukar góðum kafla og komust í fjögurra marka forystu. Fram minnkaði muninn niður í eitt mark, en tapaðir boltar og góður varnarleikur Haukakvenna gerðu það að verkum að forskotið jókst fljótt aftur. 

Munurinn fór mest niður í tvö mörk undir lokin og tókst Haukakonum því að sigla sigrinum heim á lokamínútum leiksins. Niðurstaðan, 32-29 og Haukar spila í úrslitaleiknum í Powerade bikarnum á laugardaginn.

Atvik leiksins

Ekkert sérstakt atvik en það vakti athygli að Framarar fengu sex vítaköst á fyrstu tuttugu mínútum leiksins.

Stjörnur og skúrkar

Embla Steindórsdóttir var öflug í liði Hauka með átta mörk. Jóhanna Margrét Sigurðardóttir kom þar næst á eftir með sjö mörk.

Sara Sif Helgadóttir átti nokkrar mikilvægar vörslur fyrir Hauka í leiknum en hún var með 13 varin skot.

Ásdís Guðmundsdóttir var markahæst í liði Fram með sjö mörk.

Stemning og umgjörð

Það var lífleg og góð stemning í stúkunni í kvöld. Mætingin var afar góð og stuðningsmenn beggja liða létu vel í sér heyra.

Umgjörðin til fyrirmyndar, eins og við má búast á undanúrslitaleik í bikarnum.

Dómarar

Í dómaratvíeyki kvöldins voru þeir Sigurður Hjörtur Þrastarson og Svavar Ólafur Pétursson. Nokkuð auðveld vakt á parketinu, en það var lítið um vafamál og erfiða dóma.

Viðtöl

Haraldur Þorvarðarson: „Smávægilegir hlutir sem að skildu liðin að“

„Maður er auðvitað svekktur, stelpurnar gáfu allt í þetta og þetta var hörkuleikur tveggja góðra liða. Það voru smávægilegir hlutir sem að skildu liðin að.“

„Heilt yfir var frammistaða liðsins góð. Varnarlega var liðið frábært í fyrri hálfleik sérstaklega en við dettum að vísu aðeins niður á kafla í seinni hálfleik. Þá klikkum við á nokkrum færum og það var eiginlega munurinn á liðunum í dag.“

Stefán Arnarson: „Maður þarf að sýna ást og maður þarf að skilja sinn maka“