For­stjóri Nova: Ekkert betra en brakandi hrein rúm­föt eftir gufuna

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Svona rétt um sjö en það fer eftir dagskrá dagsins. Núna eru strákarnir mínir orðnir unglingar og sjá um sig sjálfir að mestu leyti. En við eiginmaðurinn lítum svona til með þeim og komum hlutunum af stað ef þess þarf.“

Hvað er það fyrsta sem þú gerir á morgnana?

Ég er tiltölulega nýbyrjuð að vera duglegri við að taka mig til heima. 

Ég átti það áður til að nota bílferðina í vinnuna til þess að mála mig á rauðu ljósi en nú er þetta orðið aðeins vandaðra hjá mér. 

Svo er það fyrsti kaffibolli dagsins sem er alltaf sá besti en ég borða ekki mikið í morgunmat. Í bílnum á leiðinni í vinnuna heyri ég oft í vinkonu minni og við komum okkur í gírinn saman með góðu spjalli.“

Á skalanum 0-10, hversu handlaginn ertu heima fyrir?

„Það reynir nú ekki mikið á það þessa dagana. En þegar ég tek mig til þá finnst mér gaman að bora og setja upp hillur og annað eins. Síðan get ég lagað hluti sem bila og er alveg ágæt í að skipta um kló ef þarf. Þannig að ég ætla að gefa sjálfri mér svona 7-8!

Ég legg metnað í að eiga verkfæri og var sú á heimilinu sem bjó til minn eigin verkfærakassa á plötusmíða- og logsuðunámskeiði. Síðan á ég þennan forláta bor og hengi gjarnan upp hillur og svoleiðis. Við hjónin erum síðan dugleg að styðja iðnaðarmenn þegar verkefnin verða flóknari og tímafrekari.“

Í hvaða verkefni ertu að vinna helst í þessa dagana?

„Ég er nánast glæný hjá Nova, eða byrjaði þar í október í fyrra. Það hefur verið margt að setja sig inn í og ég er ljónheppin hvað fólkið á Nova er klárt og skemmtilegt.

Það er ótrúlega leitandi og öflugt í því að bæta vöruframboðið og finna nýjar leiðir til að veita viðskiptavinum okkar betri þjónustu. Rétt í þessu vorum við síðan að halda upp á Nova-daginn þar sem starfsfólkið kom saman og lagði drög að því sem við gerum á árinu. Síðan erum við að vinna að sameiningu við Ofar en það er að fara í ferli hjá Samkeppniseftirlitinu. 

Sjálf var ég síðan að koma af einni stærstu fjarskiptasýningu heims í Barcelona og er nú orðin alveg hrikalega spennt yfir því sem er væntanlegt í fjarskipta- og tæknigeiranum næstu misserin.“

Hvernig skipuleggur þú þig í vinnu?

„Ég byrja yfirleitt daginn á að fara yfir verkefnin sem liggja fyrir og forgangsraða þeim eftir mikilvægi. Ég skipulegg síðan fram í tímann þau atriði sem ég vil leggja mesta áherslu á og set á reglulega fundi og skoða aðgerðir tengdar þeim fram í tímann. 

Minn veikleiki er þó að ég er oftast aðeins of bjartsýn á hvað ég kem miklu fyrir og enda því oft á að vinna aðeins lengur en ég ætlaði mér. 

Þessa dagana er ég að athuga hvort gervigreindin geti ekki aðeins hjálpað mér í skipulaginu að þessu leyti. 

Annars held ég að engin vika hjá mér hafi endað eins og ég skipulagði enda kemur oft ýmislegt óvænt og skemmtilegt upp á sem þarf að bregðast við.“

Hvenær ferðu að sofa á kvöldin?

„Það er nú oftast upp úr miðnætti. Mér finnst mjög þægilegt að hlusta á góð lög á Spotify og hafa textastillinguna á og pæla soldið í textanum meðan ég hlusta. Ég er nú samt að minnka skjátíma beint fyrir svefn til að auka svefngæðin. 

Síðan er ekkert betra en að fara í gufu og leggjast upp í rúm í brakandi hrein rúmföt.“