Losun Lands­virkjunar jókst vegna virkjana­fram­kvæmda

Landsvirkjun losaði um sextán prósentum meira af koltvísýringi vegna bruna á eldsneyti í tengslum við framkvæmdirnar í fyrra. Heildarlosun fyrirtækisins er sögð halda áfram að aukast á næstu árum vegna framkvæmdanna við virkjanirnar tvær, stækkunnar Sigöldustöðvar og uppsetningar á toppvélum á Þeistareykjum í loftslagsbókhaldi ríkisorkufyrirtækisins fyrir árið 2025.

Losun vegna orkuvinnslunnar sjálfrar dróst saman á milli ára. Ástæðan var fyrst og fremst minni framleiðsla jarðvarmastöðva í tengslum við rekstrarerfiðleika kísilverksmiðju PCC á Bakka sem leiddi til átján prósent samdráttar í losun jarðvarmastöðva. Gróðurhúsalofttegundin koltvísýringur er meðal annars í gufu sem jarðvarmavirkjanir nýta.

Miðlunarlón Landsvirkjunar losuðu sextán prósentum meira í fyrra en árið 2024. Aukningin er rakin til veðurfars og íslausra daga. Rotnandi gróður í lónunum myndar gróðurhúsalofttegundina metan sem losnar út í andrúmsloftið í gegnum yfirborð lónanna. Ís heldur aftur af þeirri losun yfir vetrarmánuðina auk þess sem kuldi hægir á rotnuninni.

Losun Landsvirkjunar vegna orkuvinnslu á orkueiningu nam 3,1 grömmum af koltvísýringsígildum á hverja kílóvattstund í fyrra. Þegar tekið er tillit til heildarlosunar af starfseminni nam losunin 5,8 grömmum. Það er enn töluvert undir viðmiði um 9,1 gramm sem notast er við um kolefnishlutleysi orkufyrirtækja. Þá er gert ráð fyrir að fyrirtækin kaupi kolefniseiningar fyrir þeirri losun sem hlýst af framleiðslunni.

Hætta að kaupa olíu árið 2030

Framkvæmdir Landsvirkjunnar verða loftslagsvænni í framtíðinni ef áform fyrirtækisins um að hætta að kaupa jarðefnaeldsneyti árið 2030 ganga eftir.

Í bókhaldinu segir að fyrirtækið vinni markvisst að orkuskiptum í bíla- og tækjaflota þess. Í lok síðasta árs hafi 97 prósent fólksbílaflota þess gengið fyrir hreinni orku. Þar segir einnig að Mývatnssvæðið hafi orðið fyrsta jarðefnaeldsneytislausa starfssvæði Landsvirkjunar í fyrra.