Sýknudómur í hryðjuverkamálinu ó­merktur

Sindri Snær var ákærður fyrir tilraun til hryðjuverka og Ísidór hlutdeild í tilraun hans.

Dómur þess efnis var kveðinn upp klukkan 14 og hann má lesa hér. Í stuttu máli taldi Hæstiréttur að ágallar hefðu verið á túlkun Landsréttar á sönnunarkröfum almennra hegningarlaga svo og á aðferð við sönnunarmat og samningu hins áfrýjaða dóms sem voru til þess fallnir að hafa veruleg áhrif á niðurstöðu málsins. 

Þar sem Hæstiréttur gæti ekki endurmetið niðurstöðu hins áfrýjaða dóms um sönnunargildi munnlegs framburðar hafi verið óhjákvæmilegt vegna framangreindra annmarka að ómerkja hinn áfrýjaða dóm í heild sinni og vísa málinu aftur til Landsréttar til löglegrar meðferðar og dómsálagningar á ný.

Kom á óvart

Einar Oddur Sigurðsson, verjandi Ísidórs, segir að dómur Hæstaréttar hafi komið verulega á óvart. Ómerkingarkrafa ákæruvaldsins hafi lítið komið við sögu í málflutningi fyrir Hæstarétti. Vel á fjórða ár sé liðið frá handtöku Ísidórs og því sé niðurstaðan vonbrigði.

Ómögulegt að segja til um hvenær málinu lýkur

Sigríður J. Friðjónsdóttir ríkissaksóknari segir aftur á móti að niðurstaðan hafi ekki endilega komið á óvart, hún hafi fyrir fram talið allar þrjár mögulegar niðurstöður jafnlíklegar.

Framundan sé málsmeðferð frá grunni fyrir Landsrétti og ómögulegt sé að skjóta á hversu langan tíma hún muni taka. Ákæruvaldið muni fara fram á refsingu en erfitt sé að meta hversu þunga refsingu eigi að fara fram á, þar sem dómafordæmi séu engin hér á landi.

Vopnalagabrotin komu ekki til skoðunar

Í Landsrétti hlaut Sindri átján mánaða fangelsisdóm og Ísidór fimmtán mánaða dóm fyrir vopnalagabrot. Sá hluti málsins var ekki skoðaður fyrir Hæstarétti.

Ríkissaksóknari fór fram á að dómi Landsréttar yrði áfrýjað til Hæstaréttar. Tvímenningarnir hefðu verið ranglega sýknaðir af hryðjuverkaákærunni og dómurinn því bersýnilega rangur. Þar að auki sagði Ríkissaksóknari að mikilvægt væri að fá úrlausn Hæstaréttar í málinu. Hæstiréttur féllst á þau rök og samþykkti að taka málið fyrir í maí í fyrra. 

Handteknir fyrir 1.267 dögum

Eftir að þeir Sindri Snær og Ísidór voru voru handteknir í umfangsmiklum aðgerðum 21. september árið 2022 sagði lögreglan að þeir væru grunaðir um að skipuleggja hryðjuverk sem ættu að beinast að borgurum og stofnunum ríkisins. Lögreglan lagði hald á töluvert magn skotvopna og skotfæra ásamt þrívíddarprentara, þar á meðal AK-47 og AR-15-árásarriffla.

Þeir voru ákærðir snemma árs 2023 en í mars sama ár var ákærunni vísað frá vegna óskýrleika. Héraðssaksóknari lagði fram nýja ákæru á hendur þeim um miðjan júní sama ár og í henni var ætlaðri skipulagningu hryðjuverka lýst ítarlega. Ítarlega reifun ákærunnar má lesa í fréttinni hér að ofan.

Fréttin hefur verið uppfærð.