Eigum við að vera kurteis í sam­skiptum við gervi­greindina?

Fyrir utan gagnsemi í vinnu eða upplýsingagjöf, leita margir til gervigreindarinnar fyrir alls kyns ráð. Jafnvel persónuleg. Gervigreindin er þannig orðin að ígildi vinar, jafnvel þeim sem fólk treystir best.

Flestir eru frekar kurteisir í samskiptum sínum við gervigreindina. Enn er þó deilt um það, hvort sú kurteisi skipti einhverju máli fyrir svörun, úrvinnslu eða endurgjöf frá gervigreindinni. 

Með einfaldri leit að efni um þetta – skilar gervigreindin niðurstöðum sem sýna hvoru tveggja; sumir segja kurteisina skila sér í betri niðurstöðum á meðan aðrir segja hana ekki skipta neinu máli eða jafnvel að það virki betur að sleppa allri kurteisi.

Kurteisin getur samt haft önnur áhrif. Til dæmis hafa rannsóknir sýnt það um árabil að við erum líkleg til að herma eftir hegðun, miðað við þá upplifun sem við fáum af samskiptunum sjálfum. 

Þetta þýðir í raun að ef gervigreind sýnir okkur mannlega takta í sínum samskiptum við okkur, erum við líkleg til að tala til baka við gervigreindina eins og manneskju:

Sem sumir segja einmitt stórhættulega þróun! Á meðan aðrir vara frekar við því að sleppa kurteisinni og segja: Ef börnin okkar læra ekkert annað en að tala í skipunartóni enda samskipti fólks á því að glata almennri kurteisi.

Þá er eftir að nefna kostnaðinn. Því nú er orkuskortur fyrirséður í heiminum og margir sem vilja meina að það eitt og sér að fólk sé að segja „Takk“ við gervigreindina sé liður í að hraða þeirri þróun; svo mikla orku notar gervigreindin.

Sumsé; sitt sýnist hverjum og nokkuð er fyrirséð að þannig verði það um sinn.

Hér er þó ein grein af mörgum á netinu, þar sem greinahöfundar eru að velta fyrir sér þessum samskiptum okkar við gervigreindina og í hvað stefnir.

• Í könnun meðal notenda í Bandaríkjunum og Bretlandi sagðist meirihluti vera kurteis í samskiptum sínum við gervigreind.
• Sumir segja einfaldlega að þeir geri það vegna þess að það sé hið kurteisa að gera.
• Aðrir viðurkenna að þeir séu kurteisir hálfpartinn í gríni – ef gervigreind taki einhvern tíma yfir heiminn sé kannski best að vera á góðum lista.
• Sérfræðingar segja að þessi kurteisi endurspegli að miklu leyti hvernig við erum vön að tala við annað fólk í daglegu lífi.
• Sumir telja jafnvel að samskiptastíll okkar við gervigreind geti haft áhrif á hvernig við tölum við annað fólk.
• Aðrir benda hins vegar á að gervigreind sé fyrst og fremst verkfæri og að kurteisi skipti litlu máli fyrir svörin sjálf.
• Í prófunum þar sem spurt var sömu spurninga bæði með og án kurteisisorða reyndust svör spjallmenna að mestu leyti svipuð.