Sport

Fundu loks arf­taka eftir að Arnór samdi við HSÍ

Sindri Sverrisson skrifar
Nikolaj Jacobsen hefur misst afar sigursælan aðstoðarþjálfara en nú er arftakinn fundinn.
Nikolaj Jacobsen hefur misst afar sigursælan aðstoðarþjálfara en nú er arftakinn fundinn. Getty/Stuart Franklin

Nú er orðið ljóst hver verður Nikolaj Jacobsen til aðstoðar með Evrópu- og Ólympíumeistara Danmerkur í handbolta karla næstu árin.

Arnór Atlason var einn þeirra sem danska sambandið var með í sigtinu, eftir að ljóst varð að Henrik Kronborg myndi hætta sem aðstoðarþjálfari danska landsliðsins. Kronborg hafði farið á 14 stórmót og ákvað að hætta eftir Evrópumeistaratitilinn í janúar.

Samkvæmt frétt Handkastsins í lok mars þá hafði danska sambandið mikinn áhuga á að ráða Arnór sem þjálfað hefur í Danmörku um árabil og getið sér gott orð. Samningur Arnórs, sem verið hefur aðstoðarþjálfari íslenska landsliðsins síðustu ár, við HSÍ var þá að renna út og óvissa um framhaldið.

Á dögunum var hins vegar tilkynnt að Arnór hefði skrifað undir framlengingu við HSÍ og hann mun því áfram aðstoða Snorra Stein Guðjónsson næstu árin.

Danir réðu þess í stað Henrik Møllgaard sem aðstoðarlandsliðsþjálfara. Hann tekur við í september og er ráðinn fram yfir Ólympíuleikana í Los Angeles sumarið 2028 en verður einnig áfram aðstoðarþjálfari franska stórliðsins PSG. 

Møllgaard lék á sínum tíma 230 landsleiki fyrir Danmörku og varð meðal annars tvisvar Ólympíumeistari og fjórum sinnum heimsmeistari.

Henrik Möllgaard er einnig aðstoðarþjálfari PSG.Getty/Tom Weller

„Ég er virkilega ánægður með að Henrik Møllgaard hafi sagt já við starfinu. Hann er maður sem passar vel í hópinn og er nær leikmönnum í aldri. Svo er hann ótrúlega vel liðinn hjá bæði mér og leikmönnum. Á sama tíma græðum við mikið á reynslu hans af landsleikjum og stórmótum,“ sagði Jakobsen í fréttatilkynningu, ánægður með sinn nýja aðstoðarmann.




Fleiri fréttir

Sjá meira


×