Ofurtölvan telur 73 prósenta líkur á að Arsenal verði meistari

Manchester City minnkaði forskot Arsenal á toppi ensku úrvalsdeildarinnar niður í þrjú stig með 2-1 sigri í leik liðanna í gær. Ef City vinnur Burnley á miðvikudaginn kemst liðið á topp deildarinnar. 

Fyrir leikinn á Etihad í gær voru 85,2 prósenta líkur á að Arsenal yrði Englandsmeistari samkvæmt ofurtölvunni. En eftir tapið fyrir City eru 73 prósenta líkur á því að Arsenal standi uppi sem sigurvegari í ensku úrvalsdeildinni.

Á pappírnum fræga á Arsenal „þægilegri“ leiki eftir á lokaspretti tímabilsins en City. Allir fimm leikirnir sem Arsenal á eftir eru gegn liðum í neðri helmingi ensku úrvalsdeildarinnar.

Á meðan á City eftir að mæta Everton, Bournemouth og Aston Villa sem eru öll í baráttu um Evrópusæti.

Leikirnir sem City og Arsenal eiga eftir

Arsenal hefur tapað tveimur deildarleikjum í röð á meðan City hefur unnið síðustu tvo leiki sína í ensku úrvalsdeildinni og sex af síðustu átta.

Arsenal hefur verið samfleytt á toppi ensku úrvalsdeildarinnar síðan í 7. umferð en ef City vinnur nýliða Burnley á Turf Moor á miðvikudagskvöldið hirða strákarnir hans Peps Guardiola toppsætið af Skyttunum.