Traustur sam­starfsaðili í byggingar­iðnaði

Armar var stofnað árið 1999 og hefur vaxið jafnt og þétt síðan þá. Í dag er félagið stærsta leigufyrirtæki landsins í byggingariðnaði með fjölbreytt úrval véla, tækja og búnaðar. Með stofnun Armar Móta og krana árið 2008 var stigið markvisst skref í átt að sérhæfðari þjónustu og sú ákvörðun hefur svo sannarlega skilað sér.

Við settumst niður með Þorleifi Elíassyni, sölustjóra hjá Örmum Mótum og krönum, til að fá innsýn í starfsemina, markaðinn og framtíðarsýnina.

„Þú þarft í raun bara að koma á einn stað“

Þorleifur segir sérhæfingu fyrirtækisins skýra og afar hagnýta fyrir viðskiptavini. „Armar Mót og kranar leigja út steypumót og undirslátt frá Peri, sem er einn stærsti framleiðandi steypumóta í heiminum. Einnig leigjum við út byggingarkrana, bæði sjálfreisandi og svokallaða T-krana,“ útskýrir hann.

En þjónustan stoppar ekki þar. „Við seljum líka mikið af vörum sem tengjast steypu, t.d. mótaborð, kóna, rör, mótaolíu, járnabakka og fleira. Okkar styrkur liggur í því að geta útvegað meira og minna allt sem þarf þegar kemur að uppslætti og steypuvinnu. Þú þarft í raun bara að koma á einn stað.“

Það er einmitt þessi „allt á einum stað“ nálgun sem hefur reynst mörgum verktökum dýrmæt, sérstaklega þegar tími og skipulag skipta sköpum.

Byggja upp samfélagið

Viðskiptavinahópurinn endurspeglar mikilvægi starfseminnar. „Helstu viðskiptavinir okkar eru fyrirtæki á byggingarmarkaði sem sjá um uppsteypu á mannvirkjum, t.d. íbúðum, opinberum byggingum, virkjunum og brúm,“ segir Þorleifur.

Þó að hópurinn hafi haldist nokkuð stöðugur síðustu ár bendir hann á að eftirspurn eftir skilvirkum lausnum fari sífellt vaxandi. Það sé einfaldlega ekki lengur nóg að bjóða góða vöru, þjónustan þurfi líka að vera framúrskarandi.

Spurður hvað greini Armar Mót og krana frá samkeppnisaðilum stendur Þorleifur ekki lengi í vafa: „Ég myndi segja þjónustan. Við reynum að gera allt sem við getum til að þjónusta viðskiptavini okkar sem best.“

Og þar spilar mannauður lykilhlutverk. „Það skiptir öllu máli að hafa gott starfsfólk. Það er forsenda þess að við getum veitt þessa afbragðs þjónustu og boðið upp á vandaða heildarlausn.“

Það er kannski ekki flóknara en það, góð tæki og gott fólk. Samt er það oft einmitt þessi samsetning sem skilur á milli góðra og frábærra fyrirtækja.

Horfa fram á veginn með nýjan lager í kortunum

Fram undan eru spennandi tímar hjá fyrirtækinu. „Við ætlum að halda áfram að þjónusta okkar viðskiptavini eins vel og við getum. Svo erum við líka að fara að flytja lagerinn okkar á nýjan stað á næstu misserum,“ segir Þorleifur.

Ný staðsetning mun bæta aðgengi og hraða afgreiðslu sem er ekki lítið mál í hraðskreiðum byggingariðnaði. „Þetta gefur okkur líka tækifæri til að bæta við vöruframboðinu. Við erum að skoða ýmsa spennandi kosti, þó ekkert sé alveg neglt niður ennþá.“

Sterk stoð í vaxandi atvinnugrein

Byggingariðnaðurinn er ein af grunnstoðum íslensks hagkerfis og þar skipta áreiðanlegir samstarfsaðilar miklu máli. Armar Mót og kranar hefur frá upphafi fest sig í sessi sem slíkur aðili, fyrirtæki sem einfaldar flókin verkefni og heldur utan um mikilvæga þætti framkvæmda.

Eins og Þorleifur segir sjálfur, með léttum en ákveðnum tón: „Við viljum einfaldlega gera hlutina auðveldari fyrir okkar viðskiptavini.“

Og stundum er það nákvæmlega það sem þarf til að byggja eitthvað stórt.