Nýr og ó­dýrari val­kostur fyrir fyrir­tæki sem þurfa að losa úr­gang

„Stóra málið er að vekja athygli á því að þessi möguleiki er nú fyrir hendi. Hingað til hefur fyrirtækjum svolítið verið stýrt á móttökustöðvar Sorpu en nú er kominn nýr valkostur með annarri verðlagningu,“ segir Gísli Þór Arnarson, framkvæmdastjóri þjónustu hjá Terra.

Greitt fyrir það sem raunverulega er losað

Nýja móttökustöðin var opnuð í júní og segir Gísli að hugmyndin hafi meðal annars kviknað í kjölfar ákalls frá fyrirtækjum um fleiri valkosti þegar kemur að losun úrgangs.

Terra ákvað jafnframt að fara aðra leið í verðlagningu en fyrirtæki hafa víða átt að venjast. Í stað þess að magn úrgangsins sé metið út frá rúmmáli er bíllinn vigtaður þegar hann kemur inn á svæðið og aftur þegar hann fer. „Starfsmaður aðstoðar þig og leiðbeinir um í hvaða flokk úrgangurinn fer. Að ferlinu loknu er annaðhvort greitt á staðnum eða losunin skráð í reikningsviðskipti fyrirtækisins.“

Þannig borga fyrirtæki fyrir hvert kíló samkvæmt gjaldskrá. „Við erum með mjög einfalda verðskrá og höfum lagt áherslu á að gera þetta eins einfalt og hægt er fyrir fyrirtækin.“

Að sögn Gísla getur þetta skipt verulegu máli, enda getur verið erfitt að meta magn úrgangs nákvæmlega út frá rúmmáli. Með vigtuninni liggur hins vegar nákvæmlega fyrir hversu mörg kíló voru losuð. „Þetta er ódýrara, biðtíminn er minni og verðlagningin sanngjarnari. Í stað þess að meta einhverja rúmmetra er einfaldlega horft á raunþyngdina í kílóum.“

Hugsað fyrir minni fyrirtæki og verktaka

Þjónustan getur nýst fjölbreyttum hópi fyrirtækja en Gísli segir Terra meðal annars horfa til minni verktaka og fyrirtækja sem þurfa reglulega að losa úrgang en eru ekki með eigin ílát eða gáma í fastri þjónustu.

Þetta er ódýrara, biðtíminn er minni og verðlagningin sanngjarnari.

Stærri fyrirtæki eru gjarnan með gáma eða ílát á starfsstöðvum sínum sem Terra eða aðrir þjónustuaðilar tæma reglulega. Öðru máli gegnir um minni fyrirtæki þar sem úrgangurinn endar oft einfaldlega í sendibílnum eða á pallbílnum og starfsmaður þarf síðan að koma honum á móttökustöð. „Við erum fyrst og fremst að höfða til þeirra sem eru með úrganginn í bílnum sínum og þurfa sjálfir að fara og losa hann. Þetta geta verið minni verktakar, heildsalar og aðilar á sendibílum sem eru að fara út um allt og safna úrgangi hjá fyrirtækjum.“

Nýja stöðin gefur þessum hópi því kost á að aka beint í Berghellu og losa farminn þar.

Tekið á móti flestum algengum úrgangsflokkum

Tekið er á móti fjölbreyttum úrgangi í Berghellu, meðal annars bylgjupappa, pappír og pappa, plastumbúðum, heyrúlluplasti, frauðplasti, hreinu og lituðu timbri, málmum, hjólbörðum, flísum, postulíni og gleri. Einnig er tekið á móti blönduðum rekstrarúrgangi og grófum úrgangi.

„Þetta eru í raun nánast allir helstu flokkar sem fyrirtæki þurfa að losa sig við. Við tökum ekki á móti garðúrgangi og jarðvegi, en tökum til dæmis á móti grófum úrgangi, timbri, plasti og pappa og þessum helstu grunnflokkum.“

Einnig er hægt að koma með spilliefni á móttökustöð Terra.

„Starfsmaður er á svæðinu og aðstoðar við flokkun ef þörf krefur. Því þarf enginn að óttast að mæta með fullan sendibíl og standa síðan ráðalaus yfir því í hvaða gám allt saman á að fara,“ segir Gísli.

Nýr valkostur á markaðnum

Gísli segir opnun stöðvarinnar lið í því að auka þjónustu Terra við fyrirtæki sem vilja sjálf sjá um að koma úrgangi til losunar. „Við erum að stíga þetta skref til að auka þjónustuna við viðskiptavini sem eru ekki að leigja hjá okkur ílát heldur vilja einfaldlega geta komið sjálfir með úrganginn.“

Starfsmaður er á svæðinu og aðstoðar við flokkun ef þörf krefur.

Hann segir mikilvægt að fyrirtæki viti af þessum nýja möguleika, enda sé hugmyndin að bjóða raunhæfan og hagkvæman valkost fyrir fyrirtæki sem hingað til hafa haft fáa kosti þegar kemur að því að losa úrgang með þessum hætti. „Við höfum skoðað verðlagninguna vel og viljum ekki gera þetta flókið eða dýrt. Þetta þarf að vera ódýrara og sanngjarnara og biðtíminn minni. Það er í raun kjarninn í þessu.“

Móttökustöð Terra er að Berghellu 1 í Hafnarfirði og er opin virka daga frá klukkan 8 til 17.