Sport

Kempur reyna fyrir sér í fyrsta mílu-hlaupinu

Boði Logason skrifar
Öll stærstu nöfnin í hlaupaheiminum á Íslandi ætla að reyna fyrir sér í Vecct-Mílunni sem fer fram annað kvöld og verður í beinni útsendingu á Vísi.
Öll stærstu nöfnin í hlaupaheiminum á Íslandi ætla að reyna fyrir sér í Vecct-Mílunni sem fer fram annað kvöld og verður í beinni útsendingu á Vísi. Samsett

Á morgun verður brotið blað í íslenskri hlaupasögu þegar fyrsta Íslandsmeistaramótið í götumílu fer fram á Kvartmílubrautinni í Hafnarfirði. Keppnin, sem ber heitið Vecct Mílan, verður í beinni útsendingu á Vísi.

Í tilkynningu segir að um sé að ræða vottað götuhlaup samkvæmt reglum World Athletics og er þetta í fyrsta sinn sem slík keppni í mílu er haldin hér á landi.

Keppnin fer fram á sérhannaðri braut í Hafnarfirði sem uppfyllir alþjóðleg viðmið.

 Hlaupin verður ein míla, eða 1.609 metrar, á malbiki og er brautin bæði hröð og marflöt. Hringurinn er 1.119 metrar, þar sem hlaupnir eru tveir 490 metra beinir kaflar. Keppnin snýst um að hlaupa míluna á sem stystum tíma.

Vísir hefur síðustu vikur sýnt heimildarþætti um míluna sem má horfa á hér fyrir neðan.

Hlaupið verður ræst í þremur hollum. Fyrst fer fram opinn flokkur þar sem allir geta tekið þátt án tímalágmarka. Þar fá þátttakendur vottaðan tíma og keppt er um verðlaun í karla- og kvennaflokki.

Að því loknu taka við elítuhlaup karla og kvenna þar sem keppt verður um Íslandsmeistaratitla í götumílu. Í elítuflokkum er umsóknarskylda og stuðst við viðmiðunartíma í greinum á borð við 800 metra, 1.500 metra og lengri vegalengdir.

Meðal keppenda eru nokkur af fremstu hlaupurum landsins, þar á meðal Baldvin Þór Magnússon, sem stefnir á að verða fyrstur til að hlaupa míluna undir fjórum mínútum á íslenskri grundu. Þá taka einnig þátt Aníta Hinriksdóttir, Andrea Kolbeinsdóttir, Elísa Kristinsdóttir og Þorsteinn Roy. 

Sýnt verður beint frá hlaupinum í öllum flokkum á Vísi. Útsendingin hefst klukkan 19:00 annað kvöld.




Fleiri fréttir

Sjá meira


×