Arnar og Andrea sigur­vegarar Puffin-hlaupsins

Um 700 manns tóku þátt í hlaupinu en samgöngur til Eyja hafa gert bæði skipuleggjendum og keppendum erfitt fyrir og upphaflega voru 1600 keppendur skráðir til leiks. 

Puffin-hlaupið er 20 kílómetra utanvegahlaup sem fyrst var haldið árið 2018.

Arnar Pétursson kom fyrstur í mark í karlaflokki á tímanum 1:15:10 og var ekki langt frá brautarmeti Hlyns Andréssonar frá því í fyrra en það er 1:14:56. Arnar var að vinna Puffin-hlaupið í fjórða sinn á síðustu fimm árum. 

Þorbergur Ingi Jónsson varð annar á tímanum 1:16:30 og Sigurjón Ernir Sturluson þriðji á 1:20:20.

Í kvennaflokki kom Andrea Kolbeinsdóttir langfyrst í mark og stórbætti eigið brautarmet frá árinu 2022 og kom í mark á tímanum 1:20:00 en gamla brautarmetið var 1:26:24, bæting um meira en sex mínútur hjá þessari frábæru hlaupakonu.

Halldóra Huld Ingvarsdóttir varð í öðru sæti á tímanum 1:25:22 og Elísa Kristinsdóttir þriðja á 1:27:03.

Snorri Björnsson, hlaðvarpsstjarna og hlaupagarpur, og Garpur I Elísabetarson dagskrágerðamaður lýstu keppninni sem var í beinni útsendingu á Vísi.