Brosandi út að eyrum allan daginn eftir lands­liðsvalið

Snorri Steinn Guðjónsson gerði talsverðar breytingar á landsliðshópnum fyrir leikina gegn Egyptalandi og valdi meðal annars þrjá nýliða: Tryggva Þórisson, leikmann Elverum, og FH-ingana og nafnana Jón Þórarin Þorsteinsson og Jón Bjarna.

„Þetta var ótrúleg tilfinning. Ég var brosandi út að eyrum allan daginn. Ég er mjög, hvað á ég að segja, stoltur af sjálfum mér og svo er rosalega mikill heiður að vera valinn,“ sagði Jón Bjarni í samtali við íþróttadeild.

En hefur hann vonast eða beðið eftir að vera valinn í landsliðið?

„Ég er búinn að vera að vonast eftir þessu en get ekki sagt hvort ég hafi verið að bíða eftir þessu. Ég veit það ekki. Þetta er held ég afurð þess að vera duglegur og standa sig vel,“ sagði Jón Bjarni.

Hann hefur verið í hópi bestu línumanna Olís-deildarinnar undanfarin ár og varð Íslandsmeistari með FH 2024. Jón Bjarni, sem er þrítugur, hefur leikið með FH allan sinn feril ef frá er talin lánsdvöl hjá Fjölni.

Jón Bjarni kveðst spenntur að sýna sig og sanna með landsliðinu.

„Jú, auðvitað að fara á stóra sviðið og gera sitt besta. Ég get ekki beðið,“ sagði Jón Bjarni.

Leikir Íslands og Egyptalands verða 13. og 15. maí. Þeir fara báðir fram ytra.