Bláa lónið fær sér­leyfi og lóð í Þjórs­ár­dal

Í fréttatilkynningu þess efnis segir að samningurinn sé hluti af metnaðarfullri uppbyggingu sem Bláa Lónið hf. standi að baki í Þjórsárdal. Verkefnið í heild sinni sé stærsta fjárfestingin í íslenskri ferðaþjónustu um þessar mundir. Auk starfseminnar í gestastofunni vinni félagið að uppbyggingu hágæðahótels í Rauðukömbum, Mountain Retreat, og Fjallabaðanna.

Framkvæmdir séu í fullum gangi og stefnt sé að því að opna fyrsta hluta starfseminnar sumarið 2027 og að öll starfsemin verði komin í rekstur vorið 2028.

„Íslensk ferðaþjónusta er í hópi mikilvægustu útflutningsgreina landsins og skapar tekjur og störf víða um landið. Öflug ferðaþjónusta stuðlar auk þess að fjölbreyttu mannlífi, afþreyingu og þjónustu sem allir geta notið. Það er þess vegna alltaf ánægjulegt þegar einkafjárfestar ráðast í miklar fjárfestingar sem gera Ísland enn áhugaverðara og fjölbreyttara í augum ferðamanna. Uppbyggingin í Þjórsárdal er metnaðarfullt og gott dæmi um sjálfbæra nýtingu náttúruauðlinda í víðum skilningi á þessu merkilega náttúru og sögusvæði,“ er haft eftir Daða Má Kristóferssyni, fjármála- og efnahagsráðherra.

„Ísland býr yfir mikilli sérstöðu og tækifærin fram á veginn liggja í upplifunar- og vellíðunarferðamennsku, við eigum fullt erindi á heimssviðið um þessar mundir. Hjá Bláa Lóninu starfar einstakur hópur starfsfólks við hönnun, vísindi og upplifun og þetta uppbyggingarverkefni er gott dæmi um þá hæfni, þá langtímasýn og það hugrekki sem einkennt hefur Bláa Lónið frá stofnun þess. Gestastofan og Fjallaböðin í Þjórsárdal munu til lengri tíma verða einn áhugaverðasti áfangastaðurinn í ferðaþjónustu á Íslandi,“ er haft eftir Sigríði Margréti Oddsdóttur, forstjóra Bláa Lónsins.