Kæra komin á borð KKÍ vegna Kane

Kane komst sem svo oft áður í kast við stuðningsmenn í gærkvöldi. Í miðjum fagnaðarlátum Grindavíkur eftir 83-86 sigur gegn Tindastóli sendi Kane miðjufingurinn upp í stúku.

Dagur Þór Baldvinsson, formaður körfuknattleiksdeildar Tindastóls, sá hvernig Kane hegðaði sér, reiddist og lét hann heyra það. Arnar Guðjónsson þjálfari Tindastóls gagnrýndi hegðun Kane sömuleiðis harðlega í viðtali eftir leik.

Samkvæmt heimildum Vísis lenti Kane einnig í samstuði við ungan starfsmann í Síkinu þegar leikmaðurinn gekk inn í búningsklefa. 

Málið hefur verið sent til aga- og úrskurðanefndar KKÍ sem mun halda fund á morgun. Þar gæti Kane verið úrskurðaður í leikbann, fengið sekt eða verið sleppt. Niðurstaða ætti að liggja fyrir síðdegis á morgun. 

„Ég get ekki farið út í efni kærunnar en það er komin kæra sem verður tekin fyrir á morgun,“ segir Hannes S. Jónsson, framkvæmdastjóri KKÍ, í samtali við Vísi.

Nefndin mun úrskurða það hvort Kane verði dæmdur í leikbann en hegðun hans í salnum í Síkinu og umræðu um hana úr Körfuboltakvöldi má sjá hér að ofan.

Kane á sér langa sögu af leikbönnum

Kane var fyrr á tímabilinu úrskurðaður í eins leiks bann fyrir framkomu sína í leik gegn ÍR. Kane missti hausinn þegar hann var rekinn úr húsi og lét meðal annars ruslatunnu finna fyrir því.

Vegna þess banns missti Kane af mikilvægum deildarleik gegn Tindastóli.

Hann missti líka af leik gegn Tindastóli í átta liða úrslitum árið 2024, en þá fyrir hegðun sína gagnvart dómara í deildarleik gegn Stjörnunni sem hafði farið fram tveimur vikum fyrr.

Grindvíkingar horfa því upp á það í þriðja sinn á þremur árum að missa DeAndre Kane mögulega í leikbann vegna slæmrar hegðunar, fyrir mikilvægan leik gegn Tindastóli.

Fréttin hefur verið leiðrétt. Upphaflega kom fram í inngangi að kæran hefði borist til KKÍ frá Tindastóli en rétt er að eftirlitsmaður KKÍ kom málinu inn á borð aga- og úrskurðanefndar.