„Við þurfum að fara að spýta í lófana“

Verðbólguspár bankanna voru alls konar, Íslandsbanki gerði ráð fyrir að hún stæði í stað á meðan Landsbankinn spáði hjöðnun um 0,3 prósentustig. Lækkun virðisaukaskatts á eldsneyti hafði 0,32 prósenta áhrif á vísitölu neysluverðs til lækkunar.

Bergþóra Baldursdóttir, hagfræðingur hjá Íslandsbanka, segir lækkunina koma ánægjulega á óvart.

„Þessi lækkun er í takt við það sem við gerðum ráð fyrir. Verð á eldsneyti hefur verið að hækka erlendis þannig að ef ekki hefði komið til virðisaukaskattslækkunarinnar hefði eldsneyti eflaust hækkað meira. En þetta er í takt við væntingarnar,“ segir Bergþóra. 

Mikil óvissa sé í hagkerfinu, þá sérstaklega vegna ytri áhrifa, svo sem stríðs Bandaríkjanna og Íran.

„Það er útlit fyrir að við munum flytja inn einhverja verðbólgu næstu mánuði. Við búumst við því að verðbólga verði yfir forsenduákvæði kjarasamninga í ágúst. En þessar tölur eru undir væntingum þannig það er ekki öll von úti. Maður reynir að halda í vonina um að þetta takist,“ segir Bergþóra. 

Ánægjulegt sé að matvörur sem stóðu í stað í síðasta mánuði séu að lækka núna í verði.

„Við gerum ráð fyrir að verðbólga hjaðni. En hún er rosalega há eins og staðan er núna. Hún hefur verið yfir markmiði í sex ár. Við þurfum að fara að spýta í lófana til að ná verðbólgunni niður. Það mun taka tíma, það eru alls konar áföll sem dynja yfir okkur en við höfum lítið að segja um þessi ytri áhrif og þurfum að standa þau af okkur. Vonandi verða áhrifin sem minnst,“ segir Bergþóra.