Innlent

Hætt við sýningarflug Airbus-þotu yfir Reykja­vík

Kristján Már Unnarsson skrifar
Airbus A320-þotan TF-IAT lenti á Keflavíkurflugvelli um klukkan 19:20 í kvöld. Ekkert varð af því að hún flygi yfir Reykjavík.
Airbus A320-þotan TF-IAT lenti á Keflavíkurflugvelli um klukkan 19:20 í kvöld. Ekkert varð af því að hún flygi yfir Reykjavík. Sigurður B. Magnússon

Nýjasta viðbótin í flugflota Icelandair, þota af gerðinni Airbus A320, er væntanleg til landsins um kvöldmatarleytið. Flugstjórinn Kári Kárason, flotastjóri Airbus-véla Icelandair, hafði áætlað að fljúga henni yfir Reykjavík en núna hefur verið fallið frá þeim áformum.

Flugvélin fór í loftið frá Ostrava í Tékklandi klukkan 15:34 að íslenskum tíma. Kári áætlaði að vera yfir Reykjavík milli klukkan 19:15 og 19:30. Fyrir brottför gerði hann ráð fyrir að taka aðflug yfir Reykjavíkurflugvöll og bjóst við að fara niður í 500 feta hæð yfir flugbrautinni.

Guðni Sigurðsson, upplýsingafulltrúi Icelandair, hefur núna tjáð fréttastofu að ekkert verði af yfirfluginu yfir Reykjavík. Flugvélin myndi fljúga beint til Keflavíkur.

Airbus A320 er 6,9 metrum styttri en A321.Sigurður B. Magnússon

Athugasemd klukkan 20:20. Fréttin hefur verið uppfærð með nýjum ljósmyndum af flugvélinni á Keflavíkurflugvelli.

Flugvélin var smíðuð árið 2015 og var áður hjá Wizz Air. Sætaskipan hefur verið breytt og vélin fengið íslenska skráningu, TF-IAT, að sögn Guðna. 154 sæti eru í vélinni, þar af 16 á Saga premium. Ekki hafa verið settir skjáir í sætisbök en boðið verður upp á afþreyingarkerfi í streymi þar sem farþegar nota eigið tæki.

Icelandair ákvað að leigja þessa vél vegna seinkunar á afhendingu nýrrar Airbus A321-þotu, sem átti að vera sú sjöunda í nýja Airbus-flotanum en kemur ekki fyrr en í haust. Tafir urðu á afhendingu vélarinnar, sem átti að hlaupa í skarðið, og því þurfti félagið að taka inn aðra flugvél í blautleigu í nokkra daga í byrjun mánaðar frá flugfélaginu Heston Airlines í Litháen. Þeirri vél verður núna skilað.

Nýjasta Airbus A321-þota Icelandair, TF-IAE, Hofsjökull, við komuna til landsins þann 28. mars. Flugvélin sem kemur í kvöld er 6,9 metrum styttri, af gerðinni Airbus A320.Icelandair/Lukas Mach
Icelandair Airbus Reykjavíkurflugvöllur Lágflug Icelandair yfir Vestmannaeyjum

Tengdar fréttir

Segir ekkert eiga að koma í veg fyrir að Airbus noti Reykjavík

Framkvæmdastjóri Isavia Innanlandsflugvalla, Sigrún Björk Jakobsdóttir, telur Reykjavíkurflugvöll hæfan til að taka á móti Airbus-þotum og segir burðarþol flugvallarins nægilegt til að taka við þeim. Hún segir það mat Isavia innanlands að ekkert í regluverkinu eigi að koma í veg fyrir notkun Airbus-véla Icelandair á Reykjavíkurflugvelli til vara.

Icelandair tekur litáíska vél á leigu

Icelandair hefur erlenda flugvél í leigu frá litháíska leiguflugfélaginu Heston Airlines. Er um svokallaða blautleigu að ræða og fylgir erlend áhöfn með vélinni.

Engin Icelandair-þota sást á flugsýningunni

Flugáhugamenn sem lögðu leið sína á hina árlegu flugsýningu Flugmálafélags Íslands á Reykjavíkurflugvelli í gær undruðust margir að sjá enga af þotum Icelandair birtast, hvorki á flugvellinum sjálfum né í yfirflugi yfir hann. Sumir spurðu sig jafnvel hvort samskipti félagsins og flugmanna þess væru í slíku frosti að ekki væri einu sinni hægt að taka þátt í flughátíð.

Mest lesið


Fleiri fréttir

Sjá meira


×

Mest lesið