Andrea opnar sig eftir sjálfsniðurr­rif: „And­skotinn hafi það“

„Það er mjög svekkjandi að ná ekki því besta úr sér þegar það skiptir manni mestu máli,“ skrifar Andrea í opinskárri færslu á samfélagsmiðlinum Instagram eftir að hafa upplifað erfiðan dag á EM í utanvegahlaupum um nýliðna helgi þar sem að hún hafnaði í 31. sæti.

Eins og líkaminn læsist

Andrea, sem er ein af hlaupadrottningum Íslands, þurfti að há mikla baráttu við sjálfa sig þegar að hlutirnir voru ekki að fara eins og hún ætlaði sér. 

„Þegar kemur að stærsta markmiðinu er eins og líkaminn læsist, maginn herpist og hálsinn þrengist. Í kjölfarið fer hausinn með tilheyrandi neikvæðu sjálfstali og ég skokka í mark.“

Andrea hafði verið að gera frábæra hluti í aðdraganda EM og í viðtali við íþróttadeild Sýnar á dögunum opnaði hún sig um baráttu við stress og kvíða fyrir stórar keppnir og hefur hún unnið markvisst að því að sigrast á þeim þáttum. 

„Ég hélt ég væri komin lengra með þessa vinnu. Fannst ég mjög vel stemmd og róleg daginn og nóttina fyrir en svo fannst mér ég ekki hafa neina stjórn í hlaupinu sjálfu.“

Reif sjálfa sig niður 

Með færslunni birtir Andrea myndband úr hlaupinu sjálfu þar sem að Eyjólfur Guðgeirsson, hjólreiðakappi reynir að stappa í hana stálinu á erfiðum tímapunkti. 

„Eyjólfur náði myndbandi kennslu um hvernig maður á ekki að tala við sig.“

„Það er ekki styrkur að klára þegar að þú ert fokking skokkandi. Glatað,“ má heyra Andreu segja í myndbandinu eftir að Eyjólfur hafði sagt við hana að það fælist styrkur í því að klára hlaupið sem var 53,6 kílómetrar að lengd og fól í sér mikla hækkun. 

„Andskotinn hafi það. Þetta átti að vera svo góður dagur,“ sagði Andrea á meðan að Eyjólfur reyndi að stappa í hana stálinu og sagði við hana að hún væri flottust.

„Ég er nefnilegast ekki flottust,“ svaraði Andrea sem í baráttu við hausinn reyndi að snúa neikvæðni yfir í jákvæðni og þakkaði Eyjólfi og þeim sem studdu hana á leiðinni fyrir stuðningninn.