Vil­hjálmur sagði af sér þing­mennsku

Nýr meirihluti Sjálfstæðisflokksins og Miðflokksins tók við í Reykjanesbæ eftir nýafstaðnar sveitarstjórnarkosningar en Vilhjálmur var oddviti Sjálfstæðismanna.

Miklar mannabreytingar hafa verið á þingflokki Sjálfstæðisflokksins síðustu misseri en innan við vika er liðin frá því að Áslaug Arna Sigurbjörnsdóttir, fyrrverandi ráðherra og ritari flokksins, tilkynnti að hún myndi láta af þingmennsku. Vilhjálmur tók við af Áslaugu sem ritari Sjálfstæðisflokksins árið 2022. 

Þá kvaddi Þórdís Kolbrún Reykfjörð Gylfadóttir, fyrrverandi ráðherra og varaformaður Sjálfstæðisflokksins, þingið í apríl en hún hefur verið skipuð sendiherra. Bjarni Benediktsson, fyrrverandi forsætisráðherra og formaður flokksins, hætti á þingi í byrjun árs og starfar nú sem framkvæmdastjóri Samtaka atvinnulífsins. 

Vilhjálmur greinir frá afsögninni í færslu á Facebook-síðu sinni og þakkar fjölskyldu og kjósendum í Suðurkjördæmi fyrir stuðninginn í gegnum árin. Þar kemur fram að hann hafi síðast farið í ræðustól á fimmtudag og fjallað þar um samgöngumál, enda varið stórum hluta þingferilsins í störf umhverfis- og samgöngunefndar.

„Að lokum vil ég ítreka þakklæti mitt til allra þeirra sem hafa stutt mig í gegnum árin og óska sérstaklega þingflokki Sjálfstæðisflokksins velfarnaðar í störfum sínum. Nú tekur við nýr og spennandi kafli í mínu lífi sem bæjarstjóri Reykjanesbæjar, stærsta sveitarfélags landsins utan höfuðborgarsvæðisins.“

Gegndi báðum störfum

Fjallað hefur verið um þá ákvörðun Vilhjálms að segja ekki strax af sér þingmennsku og starfa samtímis sem bæjarstjóri og þingmaður í fjóra daga.

Þingmenn sem hafa setið á þingi í minnst tvö kjörtímabil eiga rétt á biðlaunum í sex mánuði en samkvæmt reglum þingsins lækka þær eða falla niður ef fyrrverandi þingmaður fær annað starf innan hálfs árs. 

Í ljósi þess að mánaðartekjur Vilhjálms fyrir setu í bæjarstjórastóli nema um 2,8 milljónum króna á mánuði og eru þar með hærri en þingfararkaup falla biðlaunin niður samkvæmt þessum sömu reglum. 

Fréttin er í vinnslu.