„Við getum al­veg full­yrt það að sumarið sé komið“

Fínasta veður er víðast hvar á landinu núna og helgarspáin góð.

„Það er sums staðar dálítill strekkingur og það hefur nú orðið hvað hlýjast í morgun á Patreksfirði, þar var 17 stig í morgun og fer enn hækkandi. Það er líka ágætt á Suður- og Vesturlandi, það er reyndar dumbungur og kaldara um norðaustanvert landið. En það er svona spurning hvað gerist suðvestanlands á höfuðborgarsvæðinu,“ segir Einar Sveinbjörnsson veðurfræðingur.

Þannig sé útlit fyrir að hafgola komi inn með deginum. 

„Þannig að spár um að hiti gæti orðið allt að 20 stig eru nú ótrúverðugar, þannig að við erum kannski að meira tala um 15-16, en engu að síður bara fínasta veður.“ 

Hitinn gæti þó náð 20 stigum í fyrsta sinn þetta sumarið í uppsveitum Suðurlands í dag.

„Við getum alveg fullyrt það að sumarið sé komið, ég held að það sé engum blöðum um það að fletta, það hefur verið það hlýtt undanfarna daga, líka raki í lofti og maður sér bara hvernig gróðurinn æðir áfram og ef það er ekki sumartengt þá veit ég ekki hvað.“

Búast má við að nóg verði að gera í sundlaugum landsins að minnsta kosti framan af degi.

„Þegar það er gott veður og jú, það er gott uv, eins og unga fólkið segir, þá náttúrulega fyllast allir sólbekkir,“ egir Anna Kristín Sigurðardóttir, forstöðumaður Vesturbæjarlaugar, en alla jafna sé létt yfir öllum á svona sólardögum.

„Það er mikið líf og svo er náttúrulega að koma leikjanámskeið inn á fullu og það er fullt af börnum yfir daginn. Þannig að það er mikið líf og fjör og fólk er að njóta sólar. En það er iðulega svona góð stemning í fólki, þú veist þó að það sé múgur og margmenni, þá er svona fólk alla jafna fólk svona glatt og jákvætt og líður vel.“

Einar segir að búast megi við því að það kólni á ný eftir helgi.

„Það má kannski reikna með því að það halli sér svona meira í einhvers konar norðanáttir og svalara veður um miðja vikuna, þá er nú 17. júní, og það verði heldur kaldara veður síðari hluta vikunnar en við erum að tala um núna.“