Draumur Bergrósar að rætast: „Ó­raun­veru­legt“

Bergrós deildi tilfinningaríkri færslu á samfélagsmiðlinum Instagram í gær þar sem hún á vart orð yfir því að hafa loks tryggt sér sæti á stóra sviðinu.

Bergrós hefur þrisvar tekið þátt á heimsleikum unglinga en verður nú á stóra sviðinu í flokki fullorðinna í fyrsta sinn. Hún lagði sérlega mikið á sig í ár til að ná því markmiði og þakkar foreldrum sínum stuðninginn. Þökk sé þeim stuðningi hafi hún getað tekið sér árspásu frá vinnu til að sinna sókninni að heimsleikasæti.

„Þetta tímabil lagði ég allt í sölurnar. Þökk sé stuðningi foreldra minna og trú þeirra á mér gat ég tekið mér frí frá skóla í eina önn til að æfa á fullu og elta drauminn minn um að komast á CrossFit-leikana. Ég hámarkaði hvern dag og ég er svo ótrúlega ánægð að þetta hafi allt saman tekist,“ segir Bergrós á Instagram.

„Það er óraunverulegt að hugsa til þess að eitthvað sem ég hef unnið svo mikið að og dreymt um í mörg ár sé í raun að gerast,“

„Ég er ótrúlega þakklát öllum þeim sem hafa trúað á mig og stutt mig á leiðinni. Þið vitið hver þið eruð,“

„Þetta ótrúlega fólk á bak við Hótel Rangá hefur haft gríðarleg áhrif á ferðalag mitt með stuðningi sínum. Fjölskylda mín og ég erum ævinlega þakklát,“ segir hún og bætir við:

„Og síðast en ekki síst, mjög sérstakar þakkir til mömmu minnar, pabba og þjálfarans míns Eggerts. Þau hafa staðið við hlið mér í gegnum allt og ég hefði ekki getað gert þetta án þeirra,“ segir Bergrós.

Frá 2009 til 2023 átti Ísland keppendur í kvennaflokki á leikunum en flestar voru þær fimm á heimsleikunum árið 2019. Þar kepptu Anníe Mist Þórisdóttir, Katrín Tanja Davíðsdóttir, Þuríður Erla Helgadóttir, Sara Sigmundsdóttir og Oddný Eik Gylfadóttir.

Komandi leikar verða þeir tuttugustu í sögunni og fara fram 21.-26. júlí næst komandi.

Áðurnefnd Annie Mist varð heimsmeistari í kvennaflokki árin 2011 og 2012 en Katrín Tanja Davíðsdóttir vann einnig í tvígang, 2015 og 2016. Þá níu heimsleika síðan að Katrín Tanja fagnaði sigri hefur hin ástralska Tia-Clair Toomey unnið í átta skipti, þar af síðustu tvenna leika.