Stephen Curry fær sögu­lega einka­sýningu í heiðurshöllinni

Curry, sem er af flestum talinn vera besta skyttan í sögu NBA, er heiðraður með sérstakri einkasýningu innan veggja hennar. „Það er erfitt að koma því í orð að vera hluti af heiðurshöllinni í körfubolta á þennan hátt,“ sagði Curry í tilkynningu.

„Þegar ég hugsa um feril minn hugsa ég um fólkið sem trúði á mig, vinnuna sem var lögð í þetta þegar enginn fylgdist með og augnablikin sem mótuðu mig innan vallar sem utan. Að fá þá sögu sagða á meðan ég er enn að spila er eitthvað sem ég tek ekki sem sjálfsögðum hlut,“ sagði Curry.

Sýningin, sem ber heitið „Stephen Curry: Beyond the Arc“ eða „Stephen Curry: Fyrir utan þriggja stiga línuna“ og verður hún opnuð almenningi í dag.

Þessi sýning mun innihalda muni frá Ólympíuleikum og meistaratitlum hans í NBA, keppnisbúninga og myndefni úr safni sem sýnir vegferð Curry frá því að vera lítt þekktur nýliði yfir í að verða margverðlaunaður fjórfaldur NBA-meistari.

„Stephen hefur ekki aðeins endurskilgreint hvernig körfubolti er spilaður, heldur hefur hann einnig sett fordæmi fyrir því hvað það þýðir að vera fyrirmynd,“ sagði John Doleva, forseti og forstjóri heiðurshallarinnar. „Þetta er sannarlega söguleg stund fyrir okkur og fyrir körfuboltaáhugafólk um allan heim.“

Curry er að hefja sitt átjánda keppnistímabil sem atvinnumaður og hefur lýst því yfir að hann vilji spila í að minnsta kosti tvö tímabil í viðbót. Búist er við að hann hefji viðræður um framlengingu samnings við Golden State Warriors þegar hann verður gjaldgengur til þess í lok ágúst.