Læri­sveinar Tinnu rétt misstu af úr­slitum

Íslendingurinn Tinna H. Ludvigsen starfar sem tvíliða- og tvenndarleiksþjálfari franska landsliðsins í badminton. Frakkland er að verða rísandi stórþjóð í badminton eftir að hafa sett mikið fjármagn í afreksíþróttastarf fyrir Ólympíuleikana í París árið 2024.

Opna kínverska mótið er eitt af fjórum Super 1000 mótum í badminton sem mætti kalla risamótin. Þar kepptu Thom Giquel og Delphine Delrue í tvenndarleik undir leiðsögn Tinnu. Tvenndarleiksparið er númer sex á styrkleikalista Alþjóðabadmintonsambandsins og er parið því í góðri stöðu á heimslistanum.

Í 8-liða úrslitum í gær unnu Gicquel og Delrue besta danska tvenndarleiksparið, Mathias Christiansen og Alexöndru Bøje, í æsispennandi leik. Danska parið er númer þrjú á styrkleikalistanum og því mikil vonbrigði fyrir Danina að detta úr leik.

Í dag mættu Gicquel og Delrue þeim Yan Zhe Feng og Dong Ping Huang frá Kína en það par er efst á styrkleikalista Alþjóðabadmintonsambandsins. Við tók hörkuleikur og var fyrri lotan gríðarlega jöfn en endaði með sigri kínverska parsins 21-19. Í seinni lotunni var erfiðara fyrir franska parið að halda í við það kínverska og endaði seinni lotan 21-14.

Í úrslitum mæta Feng og Huang öðru kínversku pari og má búast við hörkuleik í úrslitunum en sá leikur fer fram á morgun.