Skuldir hækka og afkomuspá lækkar

Nettó vaxtaberandi skuldir félagsins námu rúmum 39 milljörðum króna og hafa hækkað um rúma 6,2 milljarða frá síðustu áramótum. Er það skýrt með aukinni fjárbindingu félagsins í vörubirgðum og viðskiptakröfum tengdum hækkandi eldsneytisverði á heimsmarkaði.

„Sú mikla hækkun eldsneytisverðs á heimsmarkaði sem hefur orðið mun hafa áhrif á afkomu N1 á seinni helmingi ársins,“ er haft eftir forstjóra Festis, Ástu S. Fjeldsted, í tilkynningu en eins og áður sagði hefur afkomuspá fyrir árið 2026 verið lækkuð um hálfan milljarð. 

Nokkur aukning í vörusölu

Vörusala nam rúmum 46 milljörðum á öðrum ársfjórðungi, sem eru mánuðirnir apríl, maí og júní. Það er aukning upp á 6,4 prósent milli ára.

EBITDA lækkaði um 0,8 prósent milli ára og nam 3,9 milljörðum. Framlegð af vöru- og þjónustusölu nam 11,5 milljörðum sem er aukning um 4,7 prósent milli ára.

Handbært fé frá rekstri nam 287 milljónum króna og lækkar um 4,9 milljarða milli ára. Í tilkynningu frá félaginu er það skýrt með einskiptisáhrifum á rekstrartengdar eignir og skuldir.

Eiginfjárhlutfall félagsins var 40,2 prósent og eigið fé var tæplega 47 milljarðar. Félagið greiddi á fjórðungnum arð að upphæð 2151 milljón til hluthafa.

„Rekstur samstæðunnar gekk ágætlega á fjórðungnum, þó að framlegð af eldsneyti hafi verið undir áætlunum og fjöldi seldra eldsneytislítra dregist saman um 4,3%, einkum vegna minni sölu til stórnotenda. Góður gangur var í öðrum vöruflokkum þar sem sala og framlegð jukust milli ára. Afgreiðslufjöldi þvert á samstæðuna stóð nánast í stað milli ára en körfustærð stækkaði þar sem fjöldi seldra vara jókst um 3,7%,“ er áfram haft eftir Ástu í tilkynningunni.

Þá er í tilkynningunni lýst yfir ánægju með viðtökur eftir endurbætur á verslun Krónunnar í Lindum en þrátt fyrir níu vikna lokun hafi aðsókn á fyrri helmingi árs aukist um 2,6 prósent milli ára. Fram undan hjá félaginu séu endurbætur á verslun Elko á Granda og opnun nýs apóteks Lyfju í Vallahverfi Hafnarfjarðar.