Strætó fjölgar ferðum vegna haustumferðar

Freyja Þórisdóttir skrifar 17. ágúst 2026 21:23

Strætisvagnar á leið 1 eru oft yfirfullir á morgnana og síðdegis, þegar íbúar höfuðborgarsvæðisins flykkjast í og úr vinnu og eða skóla. Vísir/Vilhelm

Mest nýtta leið Strætó á höfuðborgarsvæðinu er leið 1 en nú hefur þremur aukavögnum verið bætt við hana alla virka morgna og er það gert til þess að auka þjónustu í takt við þyngri umferð í upphafi hausts. Leið eitt liggur frá Skarðshlíð í Hafnarfirði, í gegnum Vellina, norður í gegnum Garðabæ og Kópavog og þaðan áleiðis niður í miðbæ Reykjavíkur með lokastoppistöð við Skúlagötu.

Er þetta meðal þess sem fram kemur í tilkynningu en þar segir einnig að aukningunni sé ætlað að koma til móts við verulega fjölgun farþega sem árlega fylgi haustinu þegar skólastarf hefst á ný og flestir hafa snúið til vinnu eftir sumarfrí.

Minni líkur á yfirfullum vögnum

Leiðin sé sú mest notaða á höfuðborgarsvæðinu allt árið um kring en reynslan sýni að farþegum fjölgi verulega á leiðinni á haustin, sem jafnframt þýði að vagnar séu oft þétt setnir og jafnvel fullir.

Með fleiri vögnum minnka verulega líkur á að vagnar yfirfyllist en tíðni ferða verður áfram sú sama, á tíu mínútna fresti að morgni og síðdegis. Það verða alls fimm aukavagnar á leiðinni þar sem tveir hafa þegar verið í akstri.

Á síðustu misserum hafi tíðni mikilvægra leiða verið aukin umtalsvert auk þess sem ýmsar nýjungar hafi verið innleiddar sem stuðli að aðgengilegri almenningssamgöngum, en þar má meðal annars nefna sem dæmi snertilausar greiðslur.

Strætó Samgöngumál Reykjavík Hafnarfjörður Garðabær Kópavogur

Tengdar fréttir

Yngstu fara flestar ferðir

Nær helmingur landsmanna fer tvær til þrjár ferðir í umferðinni á dag. Ferðatíðnin minnkar almennt með hækkandi aldri en þeir yngstu fara að meðaltali 4,6 ferðir í umferðinni á dag.

7. júlí 2026 16:35

Mest lesið

Fleiri fréttir